Bakı Beynəlxalq Dəniz Ticarət Limanının ikinci mərhələsinin inşası ilə bağlı məsələ gələn ilin yanvar ayında dəqiqləşəcək.
Bunu açıqlamasında “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov bildirib.
“Bakı Limanının ikinci mərhələsi ilə bağlı hazırlıq layihəsi üzərində işlər, dizayn da daxil olmaqla artıq yekunlaşıb. Amma onun həyata keçirilməsi ilə bağlı məsələ qərar verilmə mərhələsindədir”, - T. Ziyadov əlavə edib.
Onun sözlərinə görə, Bakı Limanının inşasının birinci mərhələsi 2018-ci ildə yekunlaşıb. Hazırda limanın yükaşırma həcmi 100 000 TEU konteyner daxil olmaqla illik 15 milyon ton olub. İkinci fazanın yekunlaşdırılmasından sonra isə limandan ildə 25 milyon tona qədər yükün aşırılacağı, 500 min TEU konteynerin keçə biləcəyi planlaşdırılıb.
2024-cü ilin nəticələrinə toxunaraq T. Ziyadov bildirib: "Göstəricilərimiz proqnozların üzərindədir. Məsələn, konteyner, TIR daşımalarında çox yüksək nəticələr əldə edilib. Bu istiqamətdə göstəricilərin gələn il daha da artacağını gözləyirik. Xüsusilə gömrük rəsmilləşdirilməsi nəticəsində idxal-ixrac əməliyyatlarında artım olacağını proqnozlaşdırırıq. Ötən ildə ən böyük artım tranzit sahəsində müşahidə olunub. Söhbət xüsusilə Çindən Avropa istiqamətində daşınan yüklərin tranzitindən gedir. Bu, əlbəttə ki, Orta Dəhliz layihəsi ilə bağlıdır. Biz bu artımın dayanıqlı olmasını istəyirik”.
Xatırladaq ki, Transxəzər Beynəlxalq Nəqliyyat Marşrutu (Orta Dəhliz) Çin, Qazaxıstan, Xəzər dənizi, Azərbaycan, Gürcüstan ərazisindən keçərək Türkiyə və Avropa ölkələrinə uzanan beynəlxalq nəqliyyat dəhlizidir. 2023-cü ildə bu marşrutla 2,7 milyon tondan çox yük daşınıb ki, bu da 2022-ci illə müqayisədə 86 % çoxdur. Bu ilin yanvar-noyabr aylarında Trans-Xəzər Beynəlxalq Nəqliyyat Marşrutu ilə yük daşımalarının həcmi ötən ilin eyni dövrü ilə müqayisədə 63 % artaraq 4,1 milyon tona çatıb.
Bakı Limanında 2023-cü ildə 7,4 milyon ton yük aşırılıb. Bu, 2022-ci illə müqayisədə, təxminən, 16 % çoxdur. Ümumi yükaşırmanın 5,3 milyon tonu və yaxud 72 %-i tranzit yüklərin payına düşüb. Hesabat ilində vaqon aşırılması 3,5 % azalaraq 37,3 min ədəd olub. Vaqonların 18,6 mini və yaxud 49,7 %-i Bakı–Türkmənbaşı–Bakı, 18,7 mini və yaxud 50,3 %-i isə Bakı–Kurık–Aktau–Bakı istiqamətində hərəkət edib.
Bununla yanaşı, 2023-cü ildə iri həcmli nəqliyyat vasitələrinin (TIR) sayı əvvəlki ilə nisbətən 5,3 %artaraq 54,2 min ədəd olub. Bu nəqliyyat vasitələrinin 25,8 mini (47,6 %-i) Bakı–Türkmənbaşı–Bakı, 28,4 mini (52,4 %-i) isə Bakı Kurık–Bakı istiqamətində daşınıb. Hesabat dövründə konteynerlərin aşırılması TEU ekvivalentində 16 % azalaraq 43,9 min olub.
Prezident İlham Əliyevin 2023-cü il noyabrın 23-də təsdiq etdiyi “Azərbaycan Respublikasının ərazisindən keçən beynəlxalq nəqliyyat dəhlizlərinin tranzit potensialının artırılmasına və tranzit yükdaşımaların təşviqinə dair 2024−2026-cı illər üçün Fəaliyyət Planı”na əsasən, Bakı Beynəlxalq Dəniz Ticarət Limanının ərazisində qarşıdakı 3 il ərzində çeşidləmə məntəqəsində əlavə 4 dəmiryolu xətti və konteyner terminalı tikiləcək ki, bu da yüklərin çeşidlənməsində operativliyin təmin edilməsinə imkan yaradacaq.
© “Report”
