Bakı Dövlət Universitetində (BDU) görkəmli mətbuat tədqiqatçısı, tanınmış alim və pedaqoq, professor Şirməmməd Hüseynovun anadan olmasının 100 illik yubileyi qeyd edilib. Tədbirdə universitet rəhbərliyi, tanınmış elm adamları, jurnalistlər və tələbələr iştirak edib.
QT.az xəbər verir ki, yubiley tədbirində çıxış edən natiqlər Şirməmməd Hüseynovun Azərbaycan mətbuat tarixinə verdiyi töhfələrdən, onun pedaqoji və elmi fəaliyyətindən, xüsusilə də Həsən bəy Zərdabinin irsinin araşdırılmasında misilsiz xidmətlərindən danışıblar. Bildirilib ki, professor Şirməmməd Hüseynovun adı Azərbaycan jurnalistika məktəbinin inkişafında əbədi iz qoyub.
Tədbir iştirakçıları alimin zəngin irsinin gənc nəsil üçün örnək olduğunu qeyd ediblər. Onun tədqiqatlarının, çap olunan əsərlərinin və yetirmələrinin bu sahənin inkişafında böyük rolu xüsusi vurğulanıb.
Tədbir çərçivəsində Şirməmməd Hüseynovun həyat və yaradıcılığını əks etdirən videoçarx nümayiş etdirilib.
