“Real”ın və Almaniya yığmasının keçmiş yarımmüdafiəçisi Toni Kroos İtaliya futbolunun səviyyəsi ilə bağlı fikrini paylaşıb.
Arena.az “Milan News” dərgisinə istinadən, keçmiş futbolçunun bu barədə qənaətini təqdim edir:
“Düşünürəm ki, İtaliya futbolunun səviyyəsi son illərdə çox yüksəlib. Bu, xüsusilə Avropa yarışlarında nəzərə çarpır. Bir neçə il əvvəl “İnter” finala yüksəldi, “Atalanta” Almaniya çempionu “Bayer”lə oyunda Avropa Liqasının qalibi oldu, “Milan” “Santyaqo Bernabeu”da “Real”ı məğlub etdi. Hətta finallarda da oynaya biləcək bir neçə klub var”, deyə Kroos vurğulayıb.
Xatırladaq ki, Kroos vətəni Almaniyada keçirilən 2024-cü il Avropa çempionatından sonra peşəkar futbolçu karyerasını başa vuracağını açıqlamışdı. Buna qədər isə alman yarımmüdafiəçi “Real”la 2023/2024-cü il Çempionalar Liqasının qalibi olduğu, Dortmund “Borussiya”sı ilə möhtəşəm final oyunundan (2:0) sonra vidalaşmışdı.
2020-ci il Avropa çempionatından dərhal sonra bundestimi tərk etmiş Kross, AÇ-2024-də yığmaya köməyini təklif etmiş və yenidən bundestimin düşərgəsinə qayıtmışdı.
Toni Kroos Rostok “Hanza”sının yetirməsidir. Yarımmüdafiəçi əvvəllər “Bayer” və “Bayern”də çıxış edib və artıq, 2014-cü ilin iyulunda 25 milyon avro müqabilində “Bayern”dən keçdiyi “Real”da çıxışını başa vurduğunu elan edib.
2023/2024-cü illər mövsümündə Kroos “qaymaqlılar”ın heyətində 48 oyuna 1 qol vurub, 10 məhsuldar ötürmə ilə fərqlənib. Toninin İspaniya nəhənginin heyətində ümumi statistikası da sanballıdır: 465 oyun, 28 qol, 99 məhsuldar ötürmə.
Toni Kroos “Real”la bütün mümkün ali klub yarışlarında dəfələrlə qalib olub. Onun xəzinəsində “qaymaqlılar”la 4 İspaniya çempionluğu, 1 İspaniya Kral Kuboku, 4 İspaniya Super Kuboku, 5 UEFA Çempionlar Liqası, 4 UEFA Super Kuboku, 5 FIFA Klub Dünya Kuboku var.
Kroos 2010-cu ilin martında debüt etdiyi Almaniya yığmasının heyətində 114 oyuna 17 qol vurub, 21 məhsuldar ötürmə verib. Toni bundestimlə DÇ-2010-da və AÇ-2012-də bürünc medal qazanıb, DÇ-2014-də isə mundialın qalibi olub.
Bir müddət əvvəl, Kroosun futbol məşqçiliyi kurslarına yazıdığı barədə məlumat yayılmışdı.
