Prezident İlham Əliyev “Rossiya Seqodnya” Beynəlxalq İnformasiya Agentliyinin baş direktoru Dmitri Kiselyova verdiyi müsahibədə bir çox mühüm məsələlərə aydınlıq gətirdi”.
Bunu Milli Məclisin deputatı Nəsib Məhəməliyev bildirib.
Deputat qeyd edib ki, Azərbaycanın beynəlxalq münasibətlər sistemindəki rolu, regional əməkdaşlıq və təhlükəsizlik məsələlərinin hər biri aktuallıq təşkil edir:
“Konkret olaraq, Fransanın Ermənistanı silahlandırması məsələsinə gəlincə isə, dövlət başçımız kifayət qədər geniş informasiya imkanlarına malikdir və prosesləri yaxından izləyir, təhlil edir. Ona görə də, narahatlığını dilə gətirir. Yenidən silahlanma, təzəlikcə müharibədən çıxmış, hələ də sülh müqaviləsi imzalanmamış ölkələr arasında gərginliyin artmasına səbəb olur. Milyardlarla maliyyə vəsaiti, quruculuq-bərpa işlərinin əvəzinə silahlanmaya xərclənir. Fransanın apardığı siyasət, davranışları, Cənubi Qafqaz regionunu yenidən qan çanağına çevrilməsinə yönəlib. Bu ölkəni, Azərbaycan və erməni xalqlarının taleyi maraqlandırmır. Burada yeni bir şey yoxdur. Tarixən olduğu kimi, hazırkı vəziyyətdən öz maraqlarının təmin olunmasına çalışır və “erməni məsələsindən” alət olaraq istifadə edir. Cənab Prezidentin, bu təhlükələri görməsi və beynəlxalq ictimaiyyəti məlumatlandırması, son dərəcə böyük əhəmiyyət kəsb edir”.
