“Kəpəz”in “Zirə” ilə oyunda zədələnərək meydanı erkən tərk etmiş braziliyalı hücumçusu Paçu Lira sağalaraq kollektiv məşqlərə qoşulub.
Arena.az xəbər verir ki, bu barədə Gəncə klubunun mətbuat xidməti məlumat yayıb.
Ötən həftə fərdi halda çalışan hücumçu Azərbaycan Premyer Liqasının 17-ci turunda “Neftçi” ilə oyunu buraxmaq məcburiyyətində qalmışdı. Məşqçilər korpusunun qərarına uyğun olaraq, Paçu “Sumqayıt” ilə qarşıdakı matçda oynamaq imkanı əldə edə bilər.
Xatırladaq ki, Paçu Azərbaycan Premyer Liqasının 16-cı turunda “Zirə” ilə baş tutan matçın (0:4) 15-ci dəqiqəsində zədələnərək əvəzlənmişdi.
Ötən mövsümü “Turan Tovuz”da keçirmiş Paçu Lira oktyabr ayında azad agent kimi “Kəpəz”lə müqavilə bağlayıb. O, mövsümün sonunadək bu komandanın uğurları üçün çalışacaq. Braziliyalı hücumçu Gəncə təmsilçisinin heyətində hələlik 10 oyuna çıxıb, 2 qol vurub, 1 məhsuldar ötürmə müəllifi olub.
