“Adidas” idman şirkəti “Barselona”nın 17 yaşlı ispaniyalı cinah hücumçusu Lamin Yamala həsr edilmiş yeni butsları təqdim edib.
Arena.az məlumat verir ki, yeni butsların modeli “F50 LY304” adı altında, xəfif çəhrayı rəngdə, şirkətin loqosu isə küpə çiçəyi rəngindən lavanda rənginə qədər qradiyentdə hazırlanıb.
“F50” loqosu futbolçunun doğma şəhərinin poçt indeksinə işarə olaraq “304” qızılı nömrələri ilə əvəz edilib.
Xatırladaq ki, Yamal Espluqes-de-Lyobreqatda anadan olub, amma Mataro şəhərinin Rokafonda bölgəsində boya-başa çatıb.
“Adidas” futbolçu üçün bu butsları Yamalın da heyətində olduğu İspaniya yığmasının AÇ-2024-də qazandığı qalibiyyət və yeniyetmə futbolçunun “France Football” nəşri tərəfindən 21 yaşa qədər ən yaxşı oyunçu olaraq tanınması şərəfinə təqdim edib.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 21 oyuna çıxıb, 6 qol və 12 məhsuldar ötürmə ilə fərqlənib.
Lamin Yamalın “Barselona”da çıxışının ümumi mənzərəsi 71 oyun, 13 qol və 21 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığma komandasının heyətində 17 oyun keçirib, 3 qol vurub, 9 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı cinah hücumçusunun transfer dəyərini 150 milyon avro məbləğində qiymətləndirir.
