Fransa Liqa 1-in “Monako” ilə 16-cı tur səfər oyunu (4:2) PSJ-nin italyan əsas qapıçısı Canluici Donnarumma üçün xoşagəlməz başa çatıb.
Arena.az məlumat verir ki, oyunun birinci hissəsində, 13-cü dəqiqədə knyazlıq klubunun ivuarlı sağ cinah müdafiəçisi Vilfrid Sinqo açıq ayaqla Donnarummanın sifətinə ehtiyatsızlıqdan zərbə endirib.
Sinqonun butsunun iynələri italyan qapıçının üzünü cırıb. Qan aparmış Donnarumma 22-ci dəqiqədə rusiyalı ehtiyat qapıçı Matfey Safonovla əvəzlənib.
Üzərində cərrahi əməliyyat aparılmış italyan qapıçının üzünə 10 tikiş qoyulub. Tibbi müdaxilə elə, təxirəsalınmadan, paltardəyişmə otağında həyata keçirilib.
Oyundan sonra Donnarumma özünün sosial şəbəkə hesabı üzərində “Hər şey yaxşıdır” ifadəsini öz şəkli birlikdə paylaşıb.
Oyundan sonra Sinqo şəxsən Donnarummaya yaxınlaşaraq, mütəəssircəsinə italyan qapıçıya üzrxahlığını ifadə edib. Canlulici “cəlladının” könlünü mehribancasına alıb.
“Monako”lular üzr istədilər, PSJ bəyanat yaydı
Əlavə edək ki, Sinqo bu məqama görə qırmızı vərəqə ilə cəzalandırılmayıb, Sinqo sarı vərəqə ilə canını qurtarıb. Bu məqam Fransa futbol ictimaiyyəti arasında narazılıqla qarşılanıb.
Həmçinin “Monako”nun baş məşqçisi, avstriyalı mütəxəssis Adi Hütter də yetirməsinin sərt oyunu müqabilində Donnarumma qarşısında üzr istəyib.
Bu mənzərədə PSJ rəsmi bəyanatla çıxış edib:
“Bir çox yarası olan sifətindən zədə aldıqdan sonra Canluici Donnarumma bu axşam komanda ilə birlikdə Parisə qayıdacaq. Sabah o, tibbi müayinədən keçəcək və bir neçə gün hərəkətsiz qalmaq məcburiyyətində qalacaq”, – PSJ-nin mətbuat xidməti klubun rəsmi saytında açıqlayıb.
Canluici Donnarumma 2021-ci ilin iyulundan PSJ-də çıxış edir. Qapıçı “Milan”dan sərbəst transferlə parislilərin düşərgəsinə keçib. Tərəflər arasındakı müqavilə 2026-cı ilin iyun ayının sonuna qədər nəzərdə tutulub.
Cari mövsümdə italyan qapıçı parislilərin hetyətində 16 oyuna çıxıb, 15 qol buraxıb, 5 oyundan “quru” qurtulub.
Donnarummanın PSJ-də çıxışının ümumi mənzərəsi 130 oyun, 128 buraxılmış qol və 44 “quru” oyundan ibarətdir.
Futbol uğurlarına gəlincə, Donnrumma “Milan”la İtaliya Super Kubokunun (2016/2017), PSJ ilə Fransa Liqa 1-nin (2021/2022, 2022/2023, 2023/2024), Fransa Kubokunun (2023/2024), Fransa Super Kubokunun (2022/2023, 2023/2024) qalibi olub.
Donnarumma 2016-cı ilin sentyabr ayında debüt etdiyi və hazırda kapitanı olduğu İtaliya yığmasının heyətində 70 oyun keçirib, 58 qol buraxıb, 29 oyunda qapısının toxunulmazlığını təmin edib. Donnarumma “skuadra adzrra” ilə 2021-ci ildə İngiltərədə keçirilmiş Avropa çempionatının qalibi olub.
“Transfermarkt” internet-portalı 25 yaşlı italyan qapıçının transfer dəyərini 35 milyon avro məbləğində qiymətləndirir.
Toqquşma anının videosu videosu:
Sinqonun oyunsonrası üzrxahlığı:
