Ulyanovskda Ümummilli Lider Heydər Əliyevin xatirəsinə həsr olunmuş cüdo üzrə ənənəvi illik “Xalqlar Dostluğu Kuboku” turniri keçirilib. Hər il bu tədbir “Ulyanovsk Regional Azərbaycan Milli-Mədəni Muxtariyyəti” tərəfindən “Cüdo Federasiyası” Ulyanovsk regional ictimai təşkilatı və “Simbirsk-Cudo” Cüdoçular Assosiasiyası ilə birgə təşkil olunur.
AZƏRTAC xəbər verir ki, yarışlarda Rusiyanın müxtəlif regionlarından 450-dən çox idmançı iştirak edib.
Açılışda çıxış edən Azərbaycan muxtariyyətinin sədri İslam Hüseynov Ulu Öndər Heydər Əliyevin Ulyanovskın həyatında böyük rol oynadığını deyib. Diqqətə çatdırıb ki, Heydər Əliyev 1984-cü ildə “Aleksandr Suvorov” gəmisində baş vermiş qəzanın nəticələrinin araşdırılması və aradan qaldırılması üzrə hökumət komissiyasına rəhbərlik edib.
“Volqa üzərindən ikinci körpünün tikilməsi ideyasını məhz Heydər Əliyev dəstəklədi. 2009-cu ildə, artıq Heydər Əlirza oğlunun vəfatından sonra, Prezident Körpüsünün açılışında Azərbaycan Prezidenti İlham Əliyev iştirak etdi. Bizim şəhərimizdə Azərbaycan diasporu fəallarının təşəbbüsü ilə Heydər Əliyevin abidəsi ucaldılıb. 78 nömrəli orta məktəb onun adını daşıyır”.
İslam Hüseynov, həmçinin işə göstərdiyi köməyə görə qubernator Aleksey Russkix, Ulyanovsk vilayəti hökuməti, İdman Nazirliyi və Cüdo Federasiyasına təşəkkür edib. O, idmançılara və məşqçilərə də minnətdarlığını bildirib.
