Portuqaliyalı futbol mütəxəssisi Vitor Pereyra İngiltərə Premyer Liqasında mübarizə aparan “Vulverhempton”un baş məşqçisi təyin olunub.
Arena.az bu barədə İngiltərə klubunun rəsmi saytına istinadən xəbər verir.
56 yaşlı mütəxəssis yeni klubu ilə 1,5 illik müqaviləyə imza atıb. O, İngiltərə klubundan aldığı təklifə görə Səudiyyə Ərəbistanı təmsilçisi “Əl-Şabab”dan ayrılmağa qərar verib. Hansı ki, portuqal məşqçi 2024-cü ilin fevral ayından bu komandaya rəhbərlik edirdi. “Əl-Şabab” Vitor Pereyranın rəhbərliyi altında 30 oyuna çıxıb, bu görüşlərdə 16 qələbə qazanıb, 4 heç-heçə edib, 10 məğlubiyyətə üzülüb.
Vitor Pereyra daha öncə “Flamenqo”, “Korintians”, “Fənərbaxça”, “Şanxay”, “1860 Münhen”, “Olimpiakos”, “Əl-Əhli”, “Portu”, “Santa Klara”, “Espinyo”, “Sanxoanense” kimi komandaları da çalışdırıb.
Qeyd edək ki, Pereyra “Vulverhempton”un baş məşqçisi postunda bir neçə gün öncə istefaya göndərilmiş Qari O’Nili əvəz edib. Hansı ki, şotland mütəxəssis komandanın uğursuz nəticələrinə görə postundan kənarlaşdırılmışdı.
Qari O’Nil “Vulverhempton”un sükanı arxasına 2023-cü ilin avqustunda gətirilmişdi. İngilis mütəxəssis bu müddətdə “canavarlar”ı 63 oyuna çıxarıb. Komanda bu oyunlarda 20 qələbə qazanıb, 11 heç-heçə edib, 32 məğlubiyyət yaşayıb. Premyer Liqa təmsilçisinin top fərqi isə 94:117 nisbətindədir. Qari O’Nil daha öncə İngiltərə Premyer Liqasının digər təmsilçisi “Bornmut”a da rəhbərlik edib.
“Canavarlar” İngiltərə Premyer Liqasında 16 oyundan 9 xalla yarış cədvəlinin sonuncudan əvvəlki, 19-cu pilləsində qərarlaşıblar. Komanda 16 oyunda cəmi 2 qələbə qazanıb, 3 heç-heçə edib, 11 məğlubiyyətə üzülüb.
