Azərbaycanda sitrus meyvələri istehsalı üzrə iri sığorta ödənişi həyata keçirilib. Aqrar Sığorta Fondu tərəfindən Lənkəranda aqrar sahədə fəaliyyət göstərən “Mriya” MMC-yə limon, naringi və portağal bağına dəyən zərər üzrə 27 min manat ödəniş edilib.
Şaxtavurma nəticəsində sözügedən təsərrüfatın meyvə bağlarına ziyan dəyib. Nəticədə təsərrüfat zərərlə üzləşib, amma meyvə bağı sığortalı olduğuna görə, Aqrar Sığorta Fondu dəymiş zərəri kompensasiya edib.
Təsərrüfatın aparıcı aqronomu Ramiz Ramazanov bildirib ki, soyuq hava və şaxta sitrus bağlarına ən çox zərər vuran hallardan biridir. Adətən təsərrüfatlar bu halların qarşısını almaq üçün bitkilərin üzərinə xüsusi örtük çəkir, şaxtalı günlərdə bağlarda tonqal qalayır, ağaclara tüstü verir və digər üsullardan istifadə edirlər. Amma bu üsullar ağacları şaxtadan tam qorumur, nəticədə bağa və təsərrüfata zərər dəyir.
Bu hallardan qorunmaq üçün ən yaxşı üsul aqrar sığorta, daha dəqiqi bağları şaxtavurma (donvurma) halından sığorta etməkdir. «Mriya» şirkəti öz bağlarını baza zərfi ilə yanaşı, ayrıca olaraq şaxtavurmadan da sığorta etdiyi üçün 2024-cü ildə şaxtavurma nəticəsində dəyən zərər qarşılanıb.
Xatırladaq ki, ümumilikdə 2023-2024-cü illər ərzində Lənkəran-Astara regionundakı fermerlərə bitkiçilik sığortası üzrə 238 min manat sığorta ödənişi edilib. 2023-cü ildə bölgədə 61,5 min manat ödəniş edildiyi halda, 2024-cü ildə bu rəqəm 3 dəfəyə yaxın artaraq 176 min manatdan çox olub.
Qeyd edək ki, aqrar sığortanın əhatə etdiyi məhsulların siyahısı genişlənib. 2023-cü ildə bu regionda arpa, buğda və ərik məhsulu üzrə ödənişlər edildiyi halda, 2024-cü ildə arpa, buğda, çəltik, badam, ərik, kartof, noxud, limon, naringi və portağal məhsulları üzrə də ödənişlər edilib.
Bölgə üzrə sığorta hadisələrinin əhatə etdiyi risklər də genişlənib. Belə ki, Lənkəran-Astara regionlarında ödənişlər əsasən, dolu, fırtına, qasırğa, normadan artıq qar yağması, sel-subasma, şaxtavurma, 3-cü şəxslərin hərəkəti və vəhşi heyvanların hücumu nəticəsində dəyən zərərlər üzrə edilib.
Lənkəran-Astara regionunda heyvandarlıq üzrə də aqrar sığorta ödənişi həyata keçirilib. Son 2 ildə Lənkəran-Astara regionunda heyvandarlıq üzrə 11 720 manat ödəniş edilib. Bu ödənişlər Lənkəran və Astara rayonlarında həyata keçirilib.
