Perunun paytaxtı Limadakı “Santa-Isabel” klinikasında yumurtanın bədəndən kənarda yetişdirilməsi texnologiyasından istifadə edilməklə ilk uşaq dünyaya gəlib.
Bizim.Media xarici mətbuata istinadən xəbər verir ki, Amerikanın biotexnoloji şirkəti olan “Gameto” tərəfindən hazırlanmış “Fertilo” texnologiyası mahiyyət etibarı ilə yeni mayalanma növüdür.
Bu zaman yumurtanın yetişməsi qadın orqanizmindən kənarda, kök hüceyrələrdən laboratoriya şəraitində əldə edilən yumurtalıq dəstəkləyici hüceyrələrin köməyi ilə baş verir.
Adi süni mayalanma ilə qadın yumurtalıqların iki həftəlik hormonal stimullaşdırılmasından keçir və bütün proses üç həftə çəkir. Bu vəziyyətdə yan təsirlərin riski olduqca yüksəkdir, əlavə olaraq hormonal stimullaşdırma qadının bədəninə bir yükdür. “Fertilo” ilə isə yumurtanın yetişmə prosesinin çox hissəsi qadının bədənindən kənarda baş verir, bütün prosedur üç günə endirilir və hormon inyeksiyalarının sayı 80% azalır.
“Gameto” şirkəti artıq Peru, Avstraliya, Yaponiya, Meksika, Argentina və Paraqvaydakı tənzimləyicilərdən bu texnologiyadan istifadə etmək üçün icazə alıb. ABŞ-da şirkət klinik sınaqları tamamlayır.
Bizim.Media
