Çin ABŞ-a xəbərdarlıq edib ki, Tayvana silah göndərmək “odla oynamaq” deməkdir və bunun ciddi nəticələri ola bilər.
Hafta.az-ın yazdığına görə, ABŞ bu yaxınlarda adaya 571,3 milyon dollarlıq hərbi yardım edəcəyini açıqlayıb və 295 milyon dollarlıq silah satışına icazə verib.
“Global Times”ın məlumatına görə, Çin Xarici İşlər Nazirliyinin sözçüsü bazar günü bildirib ki, bu addım “Vahid Çin” prinsipini və üç Çin-ABŞ birgə bəyannaməsini pozur. “Vahid Çin” prinsipində deyilir ki, Tayvan Çinin ayrılmaz hissəsidir və bir gün onunla birləşəcək.
Sözçü əlavə silahların verilməsi qərarının həm də ABŞ liderlərinin “Tayvanın müstəqilliyini” dəstəkləməmək öhdəliyini pozduğunu və adadakı “separatçı qüvvələrə” dərin yanlış siqnal olduğunu bildirib.
Sözçü qeyd edib ki, adayı silahlandırmaqla Tayvanın müstəqilliyinə kömək etmək odla oynamaq və ABŞ-ın yanmasına səbəb olacaq. “Hər halda, Çini əhatə etmək üçün "Tayvan məsələsi"ndən istifadə strategiyası uğursuzluğa məhkumdur”, deyə nəşr əlavə edib.
Rəsmi Pekin silah satışına qarşı Vaşinqtona rəsmi etiraz edib. O, həmçinin ABŞ-ı Tayvanı silahlandırmağı dərhal dayandırmağa, Tayvan boğazında sülh və sabitliyə xələl gətirən hərəkətlərə son qoymağa çağırıb.
"Biz milli suverenliyi, təhlükəsizliyi və ərazi bütövlüyünü möhkəm müdafiə etmək üçün bütün lazımi tədbirləri görəcəyik", - sözçü bildirib.
Bu il Çin Amerikanın Tayvana silah satmasından sonra 5 Qərb silah istehsalçısına sanksiya tətbiq edib.
Co Bayden administrasiyasının bu il Tayvana üçüncü hərbi yardım paketi təkmilləşdirilmiş taktiki sistemlərin və dəniz silahlarının satışı ilə gəlir. Çinli strategiya analitikləri yeni silahların Tayvan üçün əhəmiyyətini görməzlikdən gəlir, eyni zamanda onların xərclərini vurğulayır və ABŞ-ı adanı silah istehsalçılarının xeyrinə istismar etməkdə günahlandırır.
