Milli Məclis bu gün keçirilən iclasında “Dövlət rüsumu” haqqında qanuna dəyişiklikləri müzakirə edərək qəbul edib.
Yenicag.az xəbər verir ki, yeni dəyişikliklərlə, dövlət rüsumlarının ödənilməsi və uçotu tamamilə rəqəmsallaşdırılacaq və “Dövlət rüsumlarının elektron idarə edilməsi (e-rüsum)” informasiya sistemi yaradılacaq.
Yeni qanunla dövlət rüsumlarının ödənilməsi “e-bildiriş” vasitəsilə həyata keçiriləcək. Bu sistem, rüsumların hesablanması və dövlət büdcəsinə düzgün şəkildə köçürülməsi üçün elektron qaydada təqdim ediləcək. “E-bildiriş”, hər bir hüquqi əməliyyat üzrə rüsumların təyinatını və ödənişini asanlaşdıracaq.
İnformasiya sistemi vasitəsilə, dövlət rüsumu üzrə daxilolmaların izlənilməsi və operativ nəzarət mümkün olacaq. Bu da büdcəyə ödənişlərin vaxtında və düzgün şəkildə keçirilməsini təmin edəcək. Eyni zamanda, artıq ödənilmiş və ya səhv hesablanmış rüsumlarla bağlı müraciətlərə baxılması prosesi də elektronlaşdırılacaq.
Hər bir “e-bildiriş” üçün 0,02 manat məbləğində xidmət haqqı tutulacaq. Bu vəsait, müvafiq orqanların işçilərinin sosial müdafiəsinin gücləndirilməsi və maddi təminatının yaxşılaşdırılması məqsədilə həmin orqanın xəzinə hesabına köçürüləcək.
Dəyişikliklər, dövlət büdcəsinə daxilolmaların izlənməsini, səmərəliliyini və proqnozlaşdırılmasını artırmağa kömək edəcək. Həmçinin, elektron nəzarət və uçot sisteminin tətbiqi, rüsumların düzgünlüyünü və vaxtında ödənilməsini təmin edəcək.
Yeni qanun layihəsi, səsverməyə çıxarılaraq üçüncü oxunuşda qəbul edilib. Gözlənilir ki, sistemin tətbiqinə yaxın zamanda başlanacaq. Bu islahat, dövlətin rəqəmsal idarəetmə sahəsindəki inkişafına mühüm töhfə verəcək.
