“Qalatasaray”ın baş məşqçisi Okan Buruk “aslanlar”ın “Roma”nın argentinalı hücumçusu Paulo Dibala ilə maraqlanmasına münasibətini bildirib.
Arena.az türk jurnalist-insayder Yağız Sabuncuoğluna istinadən, türk mütəxəssisin bu barədə fikrini təqdim edir:
“O, çox dəyərli oyunçudur. Beləsini hər bir məşqçi istəyir. Əgər biz bir iş görürüksə, bunu gizli surətdə etməliyik. Türkiyədə hər şey çox açıq şəkildə baş verir. Bu, məni narahat edir”, deyə Okan Buruk vurğulayıb.
Xatırladaq ki, daha əvvəl mətbuatda, Dibalanın “Qalatasaray”a keçidi ilə bağlı şayələr yayılıb.
Paulo Dibala Argentinanın “İnstituto” klubunun yetirməsidir. Avropa karyerasına “Palermo” ilə başlamış Dibala buradan “Yuventus”a keçib. 2022-ci ilin iyulunda isə “Roma” Dibalanı “Qoca sinyora”nın düşərgəsindən azad agent qismində “canavarlar”ın heyətinə qatıb. Argentinalı hücumçunun “Roma” ilə müqaviləsinin müddəti 2025-ci ilin iyun ayının sonuna qədər qüvvədədir.
Cari mövsümdə Dibala “canavarlar”ın heyətində 19 oyuna çıxıb, 4 qol və 2 məhsuldar ötürmə ilə fərqlənib.
Dibalanın “Roma”nın heyətində çıxışının ümumi mənzərəsi 79 oyun, 34 qol, 18 məhsuldar ötürmədən ibarətdir.
Paulo Dibalanın qənimətlər muzeyində “Palermo” ilə B Seriyası çempionluğu, “Yuventus”la İtaliya çempionluğu (5 dəfə), İtaliya Kuboku (4 dəfə), İtaliya Super Kuboku (3 dəfə) var.
Dibala 2015-ci ilin oktyabrında debüt etdiyi Argentina yığmasının heytində 40 oyuna 4 qol vurub, 7 məhsuldar ötürmə verib. Dibala “albiseleste” ilə DÇ-2022-nin və 2021/2022-ci illər mövsümü Çempionların CONMEBOL-UEFA Kubokunun qalibi olub.
“Transfermarkt” internet-portalı 31 yaşlı argentinalı hücumçunun transfer dəyərini 8 milyon avro məbləğində qiymətləndirir.
