ABŞ-nin sabiq prezidenti Cimmi Karter 100 yaşında vəfat edib.
Bu barədə “The Washington Post” qəzeti bildirib.
Məlumata görə, keçmiş dövlət başçısı dekabrın 29-da Corciya ştatının Pleyns şəhərində öz evində keçinib.
Qeyd edək ki, Karter ABŞ-nin 39-cu prezidenti olub və 1977-1981-ci illərdə bu vəzifədə çalışıb. O, insan hüquqlarının müdafiəsi sahəsindəki səyləri, İsrail və Misir arasında Kemp-Devid sazişlərinin imzalanmasında vasitəçiliyi və siyasətdən getdikdən sonra aktiv ictimai fəaliyyəti ilə tanınır ki, bunun üçün də 2002-ci ildə Nobel Sülh mükafatına layiq görülüb.
Bayden yanvarın 9-nu matəm günü elan edib
ABŞ Prezidenti Cozef Bayden keçmiş dövlət başçısı Cimmi Karterin vəfatı ilə əlaqədar 9 yanvar 2025-ci il tarixini matəm günü elan edib.
Bu, Ağ evin saytında dərc edilmiş bəyanatda qeyd olunub.
“Kədərimizi bölüşən bütün dünya insanlarını bizə qoşulmağa dəvət edirəm”, – bəyanatda deyilib. Sənədə əsasən, ölkə daxilində və xaricində dövlət müəssisələrindəki milli bayraqlar 30 gün müddətinə endiriləcək.
Daha əvvəl Amerika prezidenti “görkəmli lider, dövlət xadimi və humanist” adlandırdığı keçmiş siyasətçinin qohumlarına başsağlığı verib. Karterlə vidalaşma mərasimi Vaşinqtonda keçiriləcək.
Ağ evin seçilmiş rəhbəri Donald Tramp da başsağlığı verib. O deyib ki, “amerikalıların həyatını yaxşılaşdırmaq cəhdlərinə görə hamı Cimmi Karterə təşəkkür etməlidir”.
