“Kim doğum gününü sevməzdi? Kim təmiz yerdə, təmiz süfrə arxasında oturmağı sevməzdi? O cümlədən də oğlum Polad Həşimov! Polad Həşimovun səngərdən başqa yeri var idimi özünə də ad günü keçirtsin?! Polad Həşimov ömrünün 24 ilini Murovdağda oldu. O 24 ildə bir dəfə də olsun ad günü keçirməyib”.
Bunu Medianews.az-a açıqlamasında Milli Qəhrəman Polad Həşimovun anası Səmayə Həşimova deyib.
O daha sonra əlavə edib:
“Bir dəfə Daşkəsəndə olanda ad günündə ehtiyatımı görüb, ərzaq falan alıb onun yanına getdim. Məqsədim də onun üçün orada ad günü təşkil etmək idi. Süfrə də açdım. Axşam saat 12-nin yarısı gəlib evə çıxdı. Dedi ki, ay ana, nə ad günü? Mənim ad günüm xalqın, camaatın balasının yanındadır. Xalqın balasını tək buraxıb gəlib ad günü qeyd edə bilmərəm!” deyə qəhrəmanın anası bildirib.
Səmayə Həşimova bildirib ki, Milli Qəhrəmanın anası olmaq böyük fəxr və qürur hissidir:
“Polad Həşimovun adını indiyə qədər necə qorumuşuqsa, sona qədər də belə qoruyacağıq. Mən də, bacısı da, qardaşı da! Allah verən canı bizdən alana qədər onun adını yaşadacağıq. Arzularım çox idi. İstəyirdim ki, Polad da digər generallar kimi geyimini geyinib işə getsin, işdən evə gəlsin, onu qapıda mən qarşılayım. Onun da bir gənc kimi arzuları var idi. 24 il Murovdağından düşməmişdi. O da əlbəttə ki, rahat həyat yaşamaq istəyirdi. O səngəri özü üçün rahat həyat seçdi. Bu gün mən bəzi neqativ hadisələrdə adları çəkilən generalları görəndə Poladımla fəxr edirəm ki, o öz atasını, anasını söydürmədən dünyasını qazanıb, qəhrəman olub” deyə Səmayə Həşimova deyib.
