Dünyanın ən zəngin adamı İngiltərə futbol tarixinin ən uğurlu klublarından biri ilə maraqlanır.
News24.az xəbər verir ki, məşhur amerikalı sahibkar İlon Maskın atası Errol Mask, İlonun Liverpool-u almaq istəməsi ilə bağlı yayılan son şayiələri təsdiqləyib.
Beləki, Errol Mask “The Sun” qəzetinə açıqlamasında deyib:
"Bəli, o, əlbəttə ki, Liverpool-u almaq istərdi. Bunu hamı istəyir, hətta mən də. Onun nənəsi Liverpulda anadan olub, Liverpulda qohumlarımız var və onların sayəsində "Bitlz"dən bəzilərini tanıdıq".
Onu da bildirək ki, Maskın futbol klubu almaq istəyi ilk dəfə deyil ki, gündəmə gəlir.
2022-ci ildə əvvəllər Twitter kimi tanınan X sosial media platformasını alan Mask, Mançester Yunayted-i də alması ilə bağlı zarafat edib.
Bu hadisə "Mançester Yunayted"in "Brentford"a 4:0 hesablı ağır məğlubiyyətindən sonra baş verib.
Xatırladaq ki, Liverpool-un sahibi olan Fenway Sports Group, 2023-cü ilin yayında klubun azlıqdakı səhmlərini ABŞ-da yerləşən Dynasty Equity investisiya şirkətinə sataraq pandemiya zamanı yaranan borcların bir hissəsini ödəməyə kömək edib.
Günel Məlikzadə
