Bu ilin əsas multi-idman tədbirlərindən biri avqustun 7-17-də Çinin Çenqdu şəhərində keçiriləcək Dünya oyunları olacaq.
İdman.biz xəbər verir ki, Azərbaycan orada gimnastika yarışlarında geniş təmsil olunacaq.
İdmançılarımız tamblinq, həmçinin akrobatika və aerobikada öz bacarıqlarını nümayiş etdirəcəklər. Beynəlxalq Gimnastika Federasiyası (FIG) onları mükafatlara əsas namizədlərdən hesab edir.
Qurumun saytı aerobikada dünya çempionatının gümüş mükafatçısı Mədinə Mustafayeva və Vladimir Dolmatov qarışıq cütlüyünü vurğulayır.
“Braziliyalı cütlük Tamires Silva və Lukas Barbosa 2022-ci ildə ABŞ-ın Birmingem şəhərində keçirilən Dünya oyunlarında hazırkı dünya çempionlarını qızıl medal uğrunda mübarizədə qabaqlayaraq karyeralarının zirvəsinə çatıblar. İndi onlar Mustafayeva və Dolmatov tərəfindən daha böyük rəqabətə tab gətirməli olacaqlar. Azərbaycanlı qarışıq cütlük İtaliyada keçirilən dünya çempionatında yalnız yaponiyalılar Kitazuma Riri və Saito Mizukiyə uduzaraq, ən böyük sürprizə imza atıb və gümüş medal qazanıb”, - deyə FIG vurğulayır.
Akrobatika proqramında qarışıq cütlüklərin mübarizəsində ikiqat dünya çempionları Ağasif Rəhimov və Raziyə Seyidli, kişilər duetində ikiqat dünya çempionları Murad Rəfiyev və Daniel Abbasov, kişilərdən ibarət qrup yarışında isə dünya çempionatının bürünc medalçıları olmuş Riad Səfərov, Rəsul Seyidli, Abdullah Əl-Meşaihi və Seymur Cəfərov çıxış edəcəklər.
Gimaraeşdə keçirilən dünya çempionatında Azərbaycan komandası dörd qızıl, bir gümüş və üç bürünc medal qazanıb, komanda birinciliyində də yalnız Çinə uduzaraq ikinci olub. Düzdür, Dünya oyunlarında ev sahibləri daha yüksək nəticələr göstərməyə çalışacaqlar, amma hamının şansı var.
“Akrobatika üzrə bütün beş kateqoriya – kişi və qadın cütlükləri, qarışıq cütlüklər, kişi və qadın qrupları Çenqduda təmsil olunacaq. Dünya çempionatına əsaslanıb desək, bu hadisə əsl şou olacaq. Bir neçə komanda tədbir üçün yeni proqramlar hazırlamağı planlaşdırır”, - FIG qeyd edir.
Tamblinq yarışında isə ikiqat dünya çempionu Mixail Malkin mübarizə aparacaq.
“Akrobatik tullanışlar bu il Dünya oyunlarında da tamaşaçıları heyrətləndirməyə davam edəcək. Burada Azərbaycan, Böyük Britaniya, ABŞ, Kanada, Fransa, Portuqaliya və İspaniyadan yüksək səviyyəli gimnastlar çıxış edəcəklər”, - deyə FIG bildirir.
İdman.biz
