Sumqayıt şəhəri 76-cı məhəllənin 10 minə yaxın sakini hazırda çətin vəziyyətdə yaşayır. Məhəllədə yerləşən 100-dən çox ev su altında qalıb. Sakinlər aidiyyəti qurumlardan kömək istəyir. Manset.az Report-a istinadən xəbər verir ki, bir qrup sakin bu vəziyyətə Acıdərə kanalının daşmasının səbəb olduöunu bildirib. Kanalın suyu evlərə dolub. Hətta bəzi sakinlər məcbur olaraq məhəlləni tərk ediblər.Yaşadığı mənzilin zirzəmisinə su dolan Rəhilə Məhərrəmova bildirib ki, bu ay ərzində kanal 3 dəfə daşıb və evlər bu vəziyyətə düşüb: "15 ildir burada yaşayıram. Heç vaxt belə hadisə olmazdı. Amma bu ay üçüncü dəfədir ki, kanal daşır. Bu evdə körpə uşaqlar böyüyür. Vəziyyətlə əlaqədar onları məktəbə də göndərmirik”.Digər sakin Nazim İlyasov da evinin birinci mərtəbəsinin tamamilə su altında qaldığını deyib: "Əşyalarımız yararsız hala düşüb. Öz evim var. Amma məcburam ki, gedib kirayədə qalım"."Aidiyyəti qurumlardan kömək gözləyirik. Vəziyyət acınacaqlıdır”, - bunu isə 10 ildən çoxdur 76-cı məhəllədə yaşayan Güllər Vəliyeva söyləyib.Mövzu ilə bağlı "Azərsu" ASC-nin İctimaiyyətlə əlaqələr şöbəsinin rəisi Anar Cəbrayıllı “Report”un yerli bürosuna açıqlamasında bildirib ki, Acıdərə kanalı sovet dövründən mövcud olub və sənaye sularının kənarlaşdırılması məqsədilə fəaliyyət göstərib. Sonradan kanal ətrafında evlərin tikilməsi, yeni massivlərin salınması kanala axıdılan tullantıların həcmini artırıb və bu da bəzi vaxtlarda, xüsusən də yağışlı günlərdə həmin ərazidə müəyyən problemlərin yaranmasına səbəb olur."Qeyd edim ki, həmin kanala "Azərsu" ASC tərəfindən xidmət göstərilmir. Yəni kanal bizim balansımızda deyil. Buna baxmayaraq, Sumqayıt Şəhər İcra Hakimiyyətinin və vətəndaşların müraciəti əsasında hər hansı problem olanda biz də icra hakimiyyətinin Mənzil Kommunal Təsərrüfatı İstehsalat Birliyinə və əhaliyə dəstək olaraq ora texnika yönəldirik. Müəyyən texniki təmizləmə işləri həyata keçiririk”, - deyə A.Cəbrayıllı vurğulayıb.Sumqayıt Şəhər İcra Hakimiyyətinin Mətbuat xidmətinin rəhbəri Eyvaz Qocayev isə qeyd edib ki, Acıdərə kanalının şəhərin mərkəzindən keçən hissəsində işlər artıq yekunlaşıb. Kanalın qapalı sistemə salınması üçün beton kanalizasiya sistemi inşa edilib. Bu istiqamətdə işlərin aparılması, yəni açıq olan hissələrdə də boruya salınma işlərinin davam etdirilməsi nəzərdə tutulub.
