Bu gün dairəmizin seçiciləri ilə növbəti qəbulumuzu keçirdik. Hər zamankı kimi müxtəlif səpkili təkliflər, problemlər və narahatlıq doğuran məsələləri dinlədim. Onların həlli istiqamətində operativ şəkildə addımlar atılacaq.
Dairə ərazisində infrastruktur xarakterli çətinliklərin aradan qaldırılması üçün müvafiq icra strukturlarına müraciətlər olacaq. Hüquqi məsləhət, təhsil, pensiya məsələləri ilə bağlı komanda üzvlərimiz sakinlərimizə mümkün köməklikləri edəcəklər.
Bugünkü görüşümüzdə iki sənətkarımız, dairəmizin seçiciləri olan Ağacəbrayıl Abasəliyev və böyük ustad Rübabə xanım Muradovanın bacısı Tahirə Muradova ilə görüşmək xoş oldu. Ağacəbrayıl müəllimlə hələ seçki dövründən yaxından tanış olmuşuq, təbliğat kampaniyamızda fəal iştirak edib.
Sevindirici haldır ki, dairəmizin gənc sakinləri arasında idmanda uğur qazananların sayı artır. Özü də maraqlıdır ki, onların sırasında xanım idmançılar daha çoxdur. Əliyeva Almazxanım kikboksing üzrə çoxsaylı turnirlərin qalibidir, Avropa çempionatına hazırlaşır. Seçkilərə hazırlıq günlərində evlərində olmuşam, atasına və anasına belə tərbiyəli və cəsur qız böyütdüklərinə görə təşəkkür edirəm.
Görüşlərimiz qarşıdakı günlərdə davam edəcək.
