Azərbaycan MDB-nin işində iştirak etməyə həmişə böyük əhəmiyyət verib

Bütün istiqamətlər üzrə və təhlükəsizliyin möhkəmləndirilməsi sahəsində sıx təmaslar mövcuddur;
“Azərbaycan MDB -nin işində iştirak etməyə həmişə böyük əhəmiyyət verib.” Bu fikri Azərbaycan Prezidenti İlham Əliyev oktyabrın 11-də MDB-yə üzv dövlətlərin təhlükəsizlik və xüsusi xidmət orqanları rəhbərləri şurasının 53-cü iclasının iştirakçıları ilə görüşdə deyib.
Daim operativ informasiya mübadiləsinin aparılmasının önəmini xüsusi qeyd edən Azərbaycan Prezidenti deyib: “İnformasiya, o cümlədən onun qəbul edilməsi və ona reaksiya verilməsi baxımından böyük əhəmiyyətə malikdir. Əlbəttə ki, ölkələrimiz arasında sıx qarşılıqlı fəaliyyət əməkdaşlığın səmimi, məqsədyönlü, nəticəyə və mümkün təhdidlərin profilaktikasına və ya aradan qaldırılmasına yönəlmiş əməkdaşlıq üçün gözəl imkanlar yaradır”.
Azərbaycan Respublikası MDB çərçivəsində Ermənistan istisna olmaqla, digər bütün üzv ölkələrlə müxtəlif sahələrdə, xüsusən mədəniyyət, humanitar, elm və digər sahələrdə uğurlu əməkdaşlıq həyata keçirir. Azərbaycan MDB daxilində aparılan əməkdaşlıq çərçivəsində öz milli maraqlarını rəhbər tutur.
Azərbaycan Respublikası hər il keçirilən MDB Dövlət Başçıları Şurası, Hökumət Başçıları Şurası, İqtisadi Şura, Xarici İşlər Nazirləri Şurası və üzv olduğu digər orqanların iclaslarında fəal şəkildə iştirak edir.
Müstəqil Dövlətlər Birliyinin Əsasnaməsində təşkilatın dövlətlər arasında dostluq əlaqələrinə, mehriban qonşuluq münasibətlərinə, millətlərarası həmrəyliyə, etimada, qarşılıqlı anlaşmaya, əməkdaşlığın inkişafına və gücləndirilməsinə xidmət etdiyi vurğulanır.
Azərbaycan Respublikasının MDB-nin nizamnamə və digər orqanları yanında daimi səlahiyyətli nümayəndəsi Azərbaycan Respublikasının Belarus Respublikasındakı səfiri Lətif Qəndilovdur.
MDB Dövlət Başçıları Şurasının iclasları
16 sentyabr 2016-cı il tarixində Qırğız Respublikasının paytaxtı Bişkek şəhərində MDB Dövlət Başçıları Şurasının növbəti iclası keçirilmişdir. İclasda Azərbaycan Respublikasının Prezidenti İlham Əliyevin rəhbərliyi ilə nümayəndə heyəti iştirak etmişdir.
11 oktyabr 2017-ci il tarixində Rusiya Federasiyasının Soçi şəhərində MDB Dövlət Başçıları Şurasının növbəti iclası keçirilmişdir. İclasda Azərbaycan Respublikasının Prezidenti İlham Əliyevin rəhbərliyi ilə nümayəndə heyəti iştirak etmişdir.
26 dekabr 2017-ci il tarixində Azərbaycan Respublikasının Prezidenti İlham Əliyev Moskva şəhərində keçirilən MDB dövlət başçılarının qeyri-rəsmi zirvə görüşündə iştirak etmişdir.
28 sentyabr 2018-ci il tarixində Tacikistan Respublikasının paytaxtı Düşənbə şəhərində MDB Dövlət Başçıları Şurasının növbəti iclası keçirilmişdir. İclasda Azərbaycan Respublikasının Prezidenti İlham Əliyevin rəhbərliyi ilə nümayəndə heyəti iştirak etmişdir.
6 dekabr 2018-ci il tarixində Azərbaycan Respublikasının Prezidenti İlham Əliyev Rusiya Federasiyasının Sankt-Peterburq şəhərində keçirilən MDB dövlət başçılarının qeyri-rəsmi görüşündə iştirak etmişdir.
11 oktyabr 2019-ci il tarixində Türkmənistanın paytaxtı Aşqabad şəhərində MDB Dövlət Başçıları Şurasının növbəti iclası keçirilmişdir. İclasda Azərbaycan Respublikasının Prezidenti İlham Əliyevin rəhbərliyi ilə nümayəndə heyəti iştirak etmişdir.
20 dekabr 2019-cu il tarixində Azərbaycan Respublikasının Prezidenti İlham Əliyev Rusiya Federasiyasının Sankt-Peterburq şəhərində keçirilən MDB dövlət başçılarının qeyri-rəsmi görüşündə iştirak etmişdir.
18 dekabr 2020-ci il tarixində MDB Dövlət Başçıları Şurasının videokonfrans rejimində növbəti iclası keçirilmişdir. İclasda Azərbaycan Respublikasının Prezidenti İlham Əliyevin rəhbərliyi ilə nümayəndə heyəti iştirak etmişdir.
Mustafayeva Aygün Fazil / Bakı Qızlar Universiteti