Xoşbəxt evliliyin əsas şərtlərindən biri də yataq həyatının hər iki tərəf üçün ideal olmasıdır. Avropada qadınların cəmi 5 faizi münasibət zamanı yoldaşlarından narazı qalırlar. Onların əksəriyyəti əlaqədən tam həzz ala bilirlər. Bu da onların yataqdakı bütün istəklərinin ərləri tərəfindən gerçəkləşdirilməsi ilə əlaqələndirilir. Amma avropalı xanımlardan fərqli olaraq, azərbaycanlı xanımların 79 faizi ərlərindən narazıdır. Bəs nəyə görə qadınlar yataq münasibəti zamanı ərlərindən zövq almırlar?
News24.az Medianews.az-a istinadən xəbər verir ki, mövzu ilə bağlı ginekoloq Arzu İsmayılova sfera.az-a danışıb. O bildirib ki, cinsi əlaqədən zövq almamaq və ya qadının kişidən narazı olması problemin kişidə olduğu mənasına gəlmir: “Bu problem qadınlardan da qaynaqlana bilir. Əgər bir insanda psixoloji problemlər varsa, həmin qadınlar münasibət zamanı həzz almırlar. Qadınların əksəriyyətində oyanma çox ləng gedir. Amma bəzi hallarda qadınların zövq almama səbəbləri kişilərdir”.
Arzu İsmayılova qeyd edib ki, kişilərdə erkən eyakulyasiya son dövrlərdə həddindən artıq geniş yayılıb: “Çox insan bunu adi hal kimi qəbul edir. Lakin bu, ciddi, amma müalicəsi olan bir haldır. Bu problemin kökündə stress, əsəb və gərginlik dayanır. Bu proses yalnız fiziki deyil, orqanik və bioloji səbəblərdən də yarana bilir və nəticədə qadının kişidən razı qalmamasına səbəb olur”.
Ginekoloqun sözlərinə görə, kişilər və qadınlar arasında real fizioloji fərqlər var: “Kişilərin oyanması qadınlara nisbətən daha tez olur. Məhz bu baxımdan ön sevişmə mərhələsi uzadılmalıdır. Ailədə olan gərgin münasibətlərin kökündə də münasibət zamanı tərəflərin bir-birilərini qane etməmələri dayanır. Əlavə olaraq qeyd edim ki, cinsi münasibətdən zövq almamaq qadının sağlamlığına da mənfi təsir edir. Qalxanabənzər vəzdə, aşağı ətraflarda vena və limfalarda qan axını ciddi şəkildə pozulur. Bu da gələcəkdə damar genişlənməsinə və tromblaşmaya səbəb olur. Bu prosesin qadın və kişilərdə normal olması daxili orqanların sağlamlığı baxımından olduqca önəmlidir”.
