“Komediyalara baxmaq sağlamlığa müsbət təsir edir”.
Yeniavaz.com xəbər verir ki, bu barədə Rusiya Səhiyyə Nazirliyinin baş geriatrı Olqa Tkaçeva "İzvestiya"ya müsahibəsində deyib.
Tkaçevanın sözlərinə görə, gülüş ürək-damar sisteminin sağlamlığına müsbət təsir edir, məlumatı daha yaxşı yadda saxlamağa kömək edir və ömrü uzadır:
“Çünki insan güləndə nəfəs alması aktivləşir və bütün orqanlarda qan dövranı artır. Buna görə də, ümumi gücləndirici məşqlərin bir hissəsi kimi, məsələn, digər fiziki fəaliyyətləri çətin hesab edən xəstələrdə istifadə edilə bilər”.
Bundan əlavə, o qeyd edib ki, gülüş birbaşa ağrı və immunitet sistemi də daxil olmaqla müxtəlif beyin proseslərinə təsir göstərir:
“Komediyalara baxmaq ağrı həddini artırır, yəni ağrının intensivliyini azaldır. Bu, gülüş zamanı ağrının şiddətini azaldan, xoşbəxtlik hissi, sevinc hissi yaradan müəyyən neyrotransmitterlərin (serotonin, endorfin, dopamin, oksitosin) istehsalı ilə bağlıdır. Gülüş həm də antikor istehsal edən immun sisteminin hüceyrələrinin böyüməsini stimullaşdırır və bu da yoluxucu xəstəliklərə qarşı həssaslığı azaldır”.