Rəşad Sadıqov: “Sabah bizi olduqca vacib oyun gözləyir”

“Zirə”nin baş məşqçisi Rəşad Sadıqov UEFA Konfrans Liqasının II təsnifat mərhələsinin cavab oyununda qarşılaşacaqları “Dunayska Ştreda” ilə (Slovakiya) oyun öncəsi mətbuat konfransında iştirak edib. Matc.az xəbər verir ki, 42 yaşlı mütəxəssis sabah çətin görüşə çıxacaqlarını bildirib: “Sabah bizi olduqca vacib oyun gözləyir. “Dunayska Ştreda” kollektivi ev oyunlarında çox güclü təsir bağışlayır. Hər ev görüşlərində onları böyük azarkeş kütləsi dəstəkləyir. İlk qarşılaşmada qələbə qazanmışıq və müəyyən üstünlüyümüz var. Rəqib komanda ilk dəqiqələrdən təzyiq göstərəcək və bu fərqi aradan qaldırmağa çalışacaq. Biz də öz növbəmizdə çalışacağıq mərhələni adlayan tərəf olaq. İnanıram ki, sabah ən yaxşı görüşlərimizdən birini keçirəcəyik”. Qeyd edək ki, Slovakiyadakı “Dunayska Ştreda” – “Zirə” görüşü sabah Bakı vaxtı ilə saat 22:30-da start götürəcək. Bakıda keçirilən ilk matç “qartallar”ın 4:0 hesablı qələbəsi ilə yekunlaşıb.