Çinin Rusiya Federasiyasına hücum etməsi üçün heç vaxt indikindən yaxşı imkan ola bilməz. İndi Rusiyanın Vladivostokunu ancaq “iki kişi və bir it” qoruya bilər.

Reyting.az xəbər verir ki, bunu analitik Corc Ellison “The Telegraph” üçün yazdığı məqalədə qeyd edib.

C. Ellisonun fikrincə, Çin üçün Rusiya ərazisinin böyük hissəsini ələ keçirmək Tayvanı işğal etməkdən daha asandır. Moskvanın güclü cavabına ümid etmək çətindir, çünki onun qoşunlarının əksəriyyəti Ukraynadadır.

Genişmiqyaslı müharibədən əvvəl Rusiya ordusunda 4780-ə yaxın artilleriya qurğusu, 2060 tank və 7080 piyada döyüş maşını var idi. Eyni zamanda, Çinin 3000-dən çox özüyeriyən və 900 yedəkli silahı, 4700 döyüş və 1250 yüngül tankı, 1200 hücum silahı, 8000-dən çox piyada döyüş maşını və 3600 zirehli transportyoru var.

Bundan əlavə, Çin Xalq Azadlıq Ordusunun Quru Qoşunlarının sayı təxminən 965,000, Rusiyanın isə təqribən 550,000-dir.

“Çin, yəqin ki, Tayvana kompleks hava-dəniz işğalına hazır deyil, onun arxasında güclü ABŞ var, lakin onun Rusiyaya quru işğalı həyata keçirməkdə heç bir çətinliyi olmayacaq”, - analitik qeyd edib.

Bildirilir ki, Rusiya Sakit Okean Donanması qərargahının yerləşdiyi Vladivostok uzun müddətdir ölkələr arasında mübahisə obyektinə çevrilib. Bu əraziyə nəzarət Çinin Sakit okeanda mövqeyini gücləndirə və gəmiçilik marşrutlarına çıxışı yaxşılaşdıra bilər.

Analitik C. Ellison prezident V. Putinin ailəsinin “kiçik üzvlərinin” çin dilində sərbəst danışması ilə bağlı son açıqlamasını da xatırladıb. Onun fikrincə, bu sözlər təsadüfi deyil, çünki Kreml hökmdarı ailəsi haqqında nadir hallarda danışır.

“Ola bilsin ki, Putin bu münasibətlərdə küləyin hansı tərəfə əsdiyini dərk etməyə başlayıb? Bu, bir vaxtlar qlobal supergüc olan Rusiyanın getdikcə daha çox Çinin kiçik tərəfdaşı rolunu oynadığı dəyişən mənzərənin incə, lakin aydın göstəricisidir. Bəlkə də, sadəcə, Putinlər yeni reallığa digərlərindən daha tez uyğunlaşırlar”, - deyə analitik əlavə edib.

E. KAMAL