İtaliyanın Pantelleria adasında alimlərin Roma dövrünə aid gümüş sikkələrdən ibarət dəfinə tapması bölgənin qədim tarixinə daha çox işıq salıb.
Hafta.az-ın yazdığına görə, eramızdan əvvəl 94-74-cü illərə aid olan 27 gümüş sikkə Santa Teresa və San-Markodakı Akropolun tarixi qazıntı sahəsində aparılan bərpa işləri zamanı tapılıb.
Almaniyanın Tübingen Universitetinin tədqiqatçıları qazıntı sahəsindəki zərəri qiymətləndirərkən boş torpaqda parıldayan kiçik sikkələri müşahidə ediblər. Torpağı qazaraq daha çox şey tapıblar. Sikkələrdə üç atın çəkdiyi arabada qanadlı bir fiqur var idi. Bu simvollar təxminən 2 min il əvvəl Roma Respublikasının sonlarına doğru zərb edilmiş əsas gümüş pul vahidi olan dinarın üzərində həkk olunub.
Bundan əvvəl, 2010-cu ildə eyni tarixi ərazidə Roma dövrünə aid 100-dən çox gümüş sikkə tapılmışdı. Köhnə qazıntıda üç məşhur imperatorun - Sezar, Aqrippin və Titin büstləri də aşkar edilib. Bu tapıntılar birlikdə götürdükdə Pantelleria adasının Aralıq dənizində ticarət və mədəniyyət mərkəzi olduğunu göstərir.
Adanın mədəni irs üzrə məsləhətçisi Paolo Skarpinato deyib: “Bu kəşf Respublika dövründə Aralıq dənizinə damğasını vuran hadisələrin, kommersiya və siyasi əlaqələrin yenidən qurulması üçün dəyərli məlumat verir”.
Qazıntıların rəhbəri Tomas Şefer, arxeoloqların "25 ildir ki, San Marko ilə qidalandığını" söyləyib. “Çox gözəl qazıntı yeridir, xoşbəxtlikdən bütövdür, əsrlərdir toxunulmayıb” deyib.
Tədqiqatçılar sikkələrin eramızdan əvvəl I əsrdə Roma dənizkənarı kəndlərinə tez-tez baş verən pirat hücumlarından biri zamanı basdırıldığını düşünürlər.
