Bakı,TurkicWorld
İspaniya hökuməti, cəmiyyətin dəyişən dəyərlərini nəzərə alaraq öküz döyüşlərində təqdim edilən Milli Korrida Mükafatını ləğv edib.
TurkicWorld xəbər verir ki,İspaniyanın Mədəniyyət Nazirliyinin açıqlamasına görə, cəmiyyətin geniş təbəqələri bu fəaliyyətin heyvanlara qarşı zorakılıq kimi qəbul edildiyi üçün korridaya qarşı çıxır.
Mədəniyyət naziri Ernest Urtasun, cəmiyyətin korridaya olan münasibətinin dəyişdiyini və mükafatın artıq uyğun olmadığını qeyd edib. Nazirlik bununla bağlı vətəndaşlarla sorğu aparıb və gələn rəylərin 90%-dən çoxu mükafatın ləğvini dəstəkləyib.
Korrida iştirakına dair son məlumatlar göstərir ki, İspaniya əhalisinin yalnız 1,9%-i bu ənənədə iştirak edir. Bu azalma, xüsusilə COVID-19 pandemiyasının mədəni tədbirlərə təsirindən sonra daha da nəzərə çarpır. Pandemiya öncəsi dövrdə bu rəqəm 8% idi, 2006-2007-ci illərdə isə 9,8%-ə qədər çatmışdı.
Qeyd edək ki, 2011-ci ildə yaradılan bu mükafat, ölkədə ənənəvi olaraq öküz döyüşləri sahəsindəki nailiyyətləri tanımaq məqsədilə 2013-cü ildən bəri təqdim edilirdi.
