ABŞ prezidentliyinə namizədlər Kamala Harris və Donald Tramp teledebat zamanı Ukraynadakı müharibəni müzakirə ediblər. Respublikaçı Tramp müharibənin sona çatmasını istədiyini, demokrat Harris isə rəqibinin “seçkilərdə qalib gələndən sonra 24 saat ərzində Ukraynanı təslim edəcəyini” proqnozlaşdırıb.
Publika.az xəbər verir ki, debat zamanı moderator hər iki prezidentliyə namizəddən Ukraynanın müharibədə qalib gəlməsini istəyib-istəmədiklərini soruşub.
"Mən istəyirəm ki, bu müharibə dayansın, istəyirəm ki, milyonlarla insan ölməsin. Biz Ukraynaya Avropadan çox pul vermişik. Baxırsınızsa, rəqəm böyükdür... Avropa ödəmir, biz ödəyirik. Baydenin sadəcə olaraq Avropadan 250 milyard, sonra isə 280 milyard tələb etməyə cəsarəti çatmır”, - deyə Tramp bildirib.
Üstəlik, respublikaçı namizəd həm Ukrayna prezidenti Vladimir Zelenski, həm də Rusiya lideri Vladimir Putinlə “yaxşı münasibətləri” olduğunu vurğulayıb.
"Biz indi Üçüncü Dünya Müharibəsi ilə bağlı odla oynayırıq”, - deyə Tramp Putinin nüvə silahından istifadə edə biləcəyinə işarə edib.
Lakin Harris deyib ki, Birləşmiş Ştatlar Ukraynaya kömək etməkdən imtina etsəydi, Putin “artıq Kiyevdə oturacaqdı”. Demokrat, rəqibinin seçkidə qələbəsindən sonra 24 saat ərzində “Ukraynanı təslim edəcəyini” proqnozlaşdırıb.
