“Apple” “iPhone 16” seriyasının istehsalında əhəmiyyətli bir addım atdı və ilk dəfə Braziliyada montaja başladı.
İndex.az xəbər verir ki, Braziliya hökumətinə təqdim edilən sənədlərə görə, şirkətin istehsal tərəfdaşı “Foxconn”dur və Sao Paulodakı fabrikində sadə “iPhone 16” modelini istehsal edir.
Qeyd edək ki, “iPhone”un yığılması əvvəllər Braziliyada həyata keçirilirdi. Lakin bu qərar o deməkdir ki, ilk dəfə olaraq “iPhone” seriyası Braziliyada satışa çıxarılandan etibarən istehsal olunacaq.
Hindistan da “Apple”in istehsal strategiyasında getdikcə daha mühüm rol oynayır. “Foxconn”un ölkədəki fabriki “iPhone 16 Pro” və “Pro Max” modellərini Çinlə eyni vaxtda yığacaq. Keçən il Hindistan “iPhone 15” və “15 Plus” modellərinin istehsalını öz üzərinə götürərək bu sahədə ilk addımını atdı.
“Apple”in istehsalın müxtəlif ölkələrə yayılması strategiyası şirkətin Çindən asılılığını azaltmaq məqsədini əks etdirir. “Apple”in istehsal etdiyi ölkələr arasında Vyetnam da var.
Digər tərəfdən, “iPhone 16 Pro” modelləri üçün əvvəlcədən sifariş rəqəmləri gözləntilərin altında idi. Xüsusilə, “iPhone 16 Pro Max”ın ilkin sifarişləri “iPhone 15 Pro Max” ilə müqayisədə 16% azalıb. “iPhone 16 Pro” üçün ilkin sifarişlərin azalması 27%-lə daha da kəskin olub.
