Şamaxı – Turan Tovuz 2:2 (0:1)
1. Rikardo Fernandes – 5,5
82. Rüfət Abbasov – 5,5
66. Vasiliye Bakiç – 5,5
32. Vasiliye Radenoviç – 5,5
4. Adil Nağıyev (k) – 5,5
17. Rafael Məhərrəmli – 5,5
(5. Arsen Ağcabəyov, 81) – qiymətsiz
93. Brahim Konate – 6,0
7. Georgi Kantariya – 5,5
(10. Emin Zamanov, 76) – qiymətsiz
8. İlkin Muradov – 5,5
20. Leroy Mikels – 6,0
(60. Səbayıl Bağırov, 90+1) – qiymətsiz
9. Belajdi Pusi – 6,5
(11. Conatan Benteke, 76) – qiymətsiz
Ehtiyat oyunçular
85. Kamal Bayramov
62. Abdulla Seydəhmədov
80. Zahid Mərdanov
6. Rauf Rüstəmli
13. Ramin Əhmədov
19. Fəxri Məmmədli
22. Qurban Səfərov
24. Edqar Adilxanov
Baş məşqçi: Ayxan Abbasov
Komandanın ən yaxşısı: Belajdi Pusi
41. Sergey Samok – 5,5
25. Denis Marandiçi – 5,0
6. Araş Qaderi – 5,0
(5. Roderik Miller, 70) – 5,5
15. Emmanuel Hakman – 5,5
4. Şəhriyar Əliyev (k) – 5,0
23. Alexandro Serrano – 5,5
7. İsmayıl Zülfüqarlı – 5,5
77. Veysəl Rzayev – 6,0
(10. Xəyal Nəcəfov, 67) – 5,5
9. Kristian Da Silva – 5,5
(8. Tural Bayramlı, 67) – 5,5
11. Ayxan Quseynov – 6,0
(80. Otto Con, 67) – 5,5
99. Sadiq Şəfiyev – 6,5
Ehtiyat oyunçular
1. İvan Konovalov
71. Mehman Hacıyev
33. Eltun Turabov
39. Sadiq Quliyev
44. Rüfət Əhmədov
13. Fərid Yusifli
20. İbrahim Ramazanov
22. Nahid Əliyev
Baş məşqçi: Kurban Berdıyev
Komandanın ən yaxşısı: Sadiq Şəfiyev
Qollar: S.Şəfiyev, 5 (0:1, A.Serrano). B.Pusi, 48 (1:1, B.Konate). A.Ağcabəyov, 90 (2:1, E.Zamanov). K.Da Silva, 90+5-p. (2:2).
Vərəqələr: G.Kantariya, 9 (qeyri-idman hərəkəti). D.Marandiçi, 15 (oyunun bərpasının ləngidilməsi). B.Pusi, 17 (qeyri-idman hərəkəti). A.Qaderi, 24 (qeyri-idman hərəkəti). V.Rzayev, 33 (qeyri-idman hərəkəti). V.Bakiç, 47 (qeyri-idman hərəkəti). Ş.Əliyev, 84 (qeyri-idman hərəkəti). L.Mikels, 88 (qeyri-idman hərəkəti). X.Nəcəfov, 90+4 (hakimin qərarına etiraz) – sarı.
Hakimlər: TURAL QURBANOV, Rəhman İmami, Zöhrab Abbasov, Elvin Bayramov (hamısı Bakı).
VAR hakimi: Nicat İsmayıllı (Bakı).
VAR hakiminin köməkçisi: Zeynal Zeynalov (Bakı).
Hakim-inspektor: Anar Salmanov (Bakı).
AFFA nümayəndəsi: Nəriman Axundov (Bakı).
29 sentyabr. Şamaxı. Şəhər stadionu. 2000 tamaşaçı (2200 yerlik).
Birinci hissəyə 2, ikinci hissəyə 4 dəqiqə əlavə olunub.
Oyunun qiyməti: 6,5.
Bu oyunu prinsipial edən məqamların sayı o qədər çox idi ki...
Hər iki komandanın turnir cədvəlinin yuxarı hissəsində qərarlaşması öz yerində, indi “Şamaxı”nın “sükanı arxasında” olan Ayxan Abbasovun yayda “Turan Tovuz”dan ayrılması, “şirlər”in ötən mövsüm evdəki iki oyunun heç birində “bozqurd”a qalib gələ, qol vura bilməməsi də cəlbedici məqamlar idi. Şamaxıdakı oyunun uzatma dəqiqələri başlayanda meydan sahiblərinin bütün bu seriyalara son qoyacağını düşünmək olardı. Ancaq...
Son iki oyunda xal itirən, ötən tur evdə “Araz-Naxçıvan”a uduzan Kurban Berdıyev heyətdə qəribə rotasiyaya əl atmış, İvan Konovalov, Xəyal Nəcəfov, Otto Con, Roderik Miller kimi əsas oyunçularını ehtiyatda saxlamışdı. Düzdü, bu məqam tovuzluların hesabı erkən açmasına mane olmadı. Meydanın dərinliyindən – Serranodan uzun ötürmə alan Sadiq Şəfiyev yaşına xas olmayan ustalıqla topu qapıçının başı üzərindən aşırdı. Ümumiyyətlə, ilk yarım saat qonaqların üstünlüyü şəraitində keçdi. Quseynov və Hakman fərqi artıra bilərdi. Azarkeşlərin də irəli səslədiyi “şirlər” yalnız hissənin son 15 dəqiqəsində fəallaşdı. Mikels və Pusi müdafiədə boşluqlar axtarır, tapmayanda da uzaqdan zərbə vururdu. 40-cı dəqiqədə Rafael Məhərrəmli çoxgedişli kombinasiyanı qolla bitirməyə borclu idi. Amma bu, ilk yarıdakı sonuncu təhlükəli vəziyyət olmadı. Uzatma dəqiqələrində Ayxan ideal ötürmə ilə Veysəl Rzayevi zərbə mövqeyinə çıxardı. Amma o, topu qapıçının yanından vurdu.
Maraqlıdı ki, meydan sahiblərinin hissənin sonundakı təzyiqi Berdıyevi hansısa taktiki addım atmağa vadar etmədi. Və belədə “Şamaxı”nın 2-ci hissə başlayan kimi hesabı bərabərləşdirməsi təəccüb doğurmadı. Sağ cinahla qurulan hücumun ardından Konate topu cərimə meydançasına göndərdi. Burda Şəhriyarla Qaderini qabaqlayan Pusi qapıya qarşısıalınmaz zərbə vurdu. Ümumiyyətlə, 2-ci hissəni birmənalı şəkildə “Şamaxı”nın hesabına yazmaq lazımdı. 62-ci dəqiqədə Konate bir hücumun gedişində iki imkanı boşa verdi.
Tovuzlular zaman-zaman əks-hücuma çıxsalar da, real qol vəziyyətlərindən danışmaq çətin idi. 90-cı dəqiqədə onların qapısına 2-ci qol vuruldu. Şəxsən mənə elə gəlir ki, həmin epizodda İlkin Muradova qarşı qayda pozulmamışdı. Amma oyuna nəzarəti əldən verən Tural Qurbanov şübhəli cərimə zərbəsi təyin etdi. Bu məqamda Ayxan Abbasovun əvəzləmələri işə yaradı. Zamanovun havalandırdığı topu onun kimi oyuna sonradan qoşulan Ağcabəyov başla tora qovuşdurdu. Bu da oyunda son qol deyildi. Hesabı bərabərləşdirmək üçün irəli atılan tovuzlular uzatma dəqiqələrində hədəfinə çatdı. Cərimə meydançasına asma zamanı top Arsenin əlinə dəydiyindən hakim “nöqtə”ni göstərdi. Da Silva bərabərlik imkanını əldən vermədi. Beləliklə, Ayxan Abbasovla Kurban Berdıyevin ilk dueli “sülh”lə bitdi. Bu hesabın oyunun axarına uyğun olduğunu deyə bilərik.
Gözdən qaçmadı
* Futbola gözəllik qatan azarkeşdi. Tovuzdan Şamaxıya komandasını dəstəkləmək üçün gələn yüzlərlə azarkeş Ehtiram Quliyevi tribunada görüncə “ən böyük başqan bizim başqan” qışqırmağa başladı. Sonradan da bu şüar dəfələrlə təkrarlandı.
* Oyunu izləməyə gələnlər arasında “Zirə”nin baş məşqçisi Rəşad Sadıqov və köməkçisi Eltun Yaqublu, futbol veteranlarından İsgəndər Cavadov, Oqtay Abdullayev, xalq artisti İlham Namiq Kamal da var idi.
* Şamaxılı azarkeşlərdən biri “Ramizlə premyer-liqaya, Ayxanla Avropaya” pankartını açmışdı. Uzatma dəqiqələrində vurulan bərabərlik qolu yerli fanatları necə qəzəbləndirdisə, onlar Tural Qurbanovu belə demək mümkünsə, didməyə hazır idi. Referi meydanı tərk edərkən ən müxtəlif söyüşləri eşitdi.
* Media sektorunda hədsiz çox jurnalist var idi. İş elə gətirdi ki, hamının sərbəst çalışması üçün stul çatışmadı, elə “vay-fay” da yükə dözmədi və ona qoşulmaq mümkün olmadı.
* Berdıyev oyunun axarını sakit izləyir, onun futbolçulara göstərişlərini əsasən Cavid Hüseynov çatdırırdı.
ORXAN
