Rusiyada aparılan araşdırmaya görə, bazardakı kosmetik məhsulların 65 faizinin tərkibində sağlamlıq üçün zərərli maddələr var. Milli İstehlakçı Hüquqlarını Müdafiə Assosiasiyası bildirib ki, bu məhsulların 76 faizində istifadə ilə bağlı xəbərdarlıq məlumatları yoxdur. Həmçinin müəyyən edilib ki, inqrediyent siyahılarını oxumaq çətindir və inqrediyentlərin adları təsadüfi dəyişdirilib.
Hafta.az-ın yazdığına görə, araşdırma zamanı ən çox rast gəlinən pozuntu məhsulun tərkib hissələrinin rus dilində deyil, latın dilində yazılması olub. İstehlakçıların şikayətləri əsasında aparılan araşdırmalarda bir çox məhsulların tərkibində inqrediyent siyahısı olmadığı və potensial kanserogen maddələrin müxtəlif adlar altında gizlədildiyi üzə çıxıb.
Ekspert Pavle Şapkin ucuz kosmetik məhsulların çox vaxt sağlamlığa zərərli maddələrdən istifadə etdiyini deyib.
Bildirilib ki, kosmetik məhsullarda istifadə olunan 1500-dən çox maddə qadağan olunsa da, istehlakçılar bu məhsulların tərkibinə o qədər də əhəmiyyət vermir. Hətta məhsullar əksər hallarda qiymət və qablaşdırma ilə diqqəti cəlb edir. İstehlakçılar Birliyi bu vəziyyəti düzəltmək üçün kosmetik məhsulların məcburi etiketlənməsinin tətbiqinə tərəfdardır.
Bununla belə, Ətir və Kosmetika Məhsulları İstehsalçıları Assosiasiyasının icraçı direktoru Andrey Samoylov iri istehsalçıların artıq beynəlxalq standartlara uyğun istehsal etdiklərini və məhsullarının təhlükəsizliyinə diqqət yetirdiklərini bəyan edərək, əlavə qaydalara ehtiyac olmadığını bildirib.
