Doğru.az xəbər verir ki, 2 oktyabr tarixində Kiçik və Orta Biznes Subyektləri və Klublarının Assosiasiyasının (KOBSKA) və “Davamlı Gələcək Platforması”nın COP29`da birgə təşkil olunacaq pavilyonu ilə bağlı təqdimat mərasimi baş tutub.
Tədbirin rəsmi açılış mərasimində açılış nitqini Kiçik və Orta Biznes Subyektləri və Klublarının Assosiasiyasının İdarə Heyətinin sədri Nigar Ələsgərova edib. Daha sonra tədbirin rəsmi qonaqlarından olan Kiçik və Orta Biznesin İnkişafı Agentliyinin İdarə Heyətinin sədr müavini Hikmət Məmmədov, “Davamlı Gələcək Platforması” təsisçisi, “Türk Dünyası Kənd Təsərrüfatı Birliyi”nin sədri Doğan Başaran,
“Agriconnect Türkiye” rəhbəri Havva Olçum çıxış ediblər.
Rəsmi açılış mərasimindən sonra Havva Olçum COP29’da qurulacaq stend ilə bağlı
ətraflı məlumat verib, sahibkarların KOBSKA və “Davamlı Gələcək Platforması”nın stendində təmsil olunmaq imkanları ilə bağlı danışıb.
Daha sonra sahibkarların, media nümayəndələrinin və digər tədbir iştirakçılarının sualları cavablandırılıb.
Təqdimatdan sonra çıxışlar davam edib. “Trendyol” şirkətinin Korporativ Kommunikasiyalar rəhbəri Süheyla Cəfərova, “İyi Gelecek Sürdürülebilirlik”
Konsaltinq şirkətinin təsisçisi Aslı Pasinli, Prof. Dr. Levent Kurnaz öz fikirlərini bölüşüblər.
Məlumat üçün bildirək ki, tədbirə 100-ə yaxın iştirakçı qatılıb. Təqdimatın sonunda çıxışçılar sahibkarları, media nümayəndələrini, iştirakçıları gələcəyimizi formalaşdırmaqda fəal olmağa dəvət edib.
Qeyd edək ki, “Trendyol” şirkəti COP29’da qurulacaq stendin baş sponsorudur.
Xatırladaq ki, dünyanın ən böyük qlobal tədbiri olan COP29 11-22 noyabr tarixlərində ölkəmizdə keçiriləcək.
DOĞRU.AZ
