Rusiya Federasiyasının prezidenti Vladimir Putin ABŞ-ın 47-ci prezidenti seçilən Donald Trampı təbrik edərək onunla danışmağa hazır olduğunu bildirib. O, Rusiyanın Soçi şəhərində keçirilən Beynəlxalq Valday Diskussiya Klubunun toplantısında çıxış edib.
Trampa qarşı təşkil olunan sui-qəsd cəhdi zamanı onun göstərdiyi davranışdan təsirləndiyini qeyd edən Putin “Bundan təsirləndim. Onun cəsur bir insan olduğu ortaya çıxdı” deyib. Prezident Trampın son dövrünü keçirəcəyini və nələrin baş verəcəyini bilmədiyini ifadə edərək “Tramp tərəfindən Rusiya ilə əlaqələri yenidən qurmaq, Ukrayna böhranının sona çatmasına töhfə vermək istəyi ilə bağlı bəzi şeylər ifadə olundu. Məncə bu, ən azından diqqətə layiqdir” ifadəsini işlədib.
Vladimir Putin Rusiyanın ABŞ-da xalqın etimadı ilə seçilən dövlət başçısı ilə işləyəcəyini daha əvvəl də bildirdiyini vurğulayaraq “Həqiqətən də belə olacaq. Bu fürsətdən istifadə edərək onu ABŞ prezidenti seçilməsi münasibətilə təbrik etmək istəyirəm. Əgər kimsə əlaqələri davam etdirmək istəyirsə, buna qarşı deyilik” deyə bildirib.
O, “Trampla danışmağa hazırsınızmı?” sualına “Hazıram, hazıram” cavabını verib.
