Özbəkistan Prezidenti Şavkat Mirziyoyev noyabrın 12-də Bakıda keçirilən BMT-nin İqlim Dəyişikliyi Konvensiyasının (COP29) Tərəflər Konfransının 29-cu sessiyası çərçivəsində Dünya Liderlərinin Zirvə görüşündə çıxış edib.
"Unikal" xəbər verir ki, bu barədə Özbəkistan mətbuatı yazıb.
O, qlobal iqlim dəyişikliyi ilə mübarizəyə və bu sahədə beynəlxalq əməkdaşlığın gücləndirilməsinə yönəlmiş bir sıra mühüm təşəbbüslər təqdim edib.
Mirziyoyev çıxışı zamanı vurğulayıb ki, iqlim dəyişikliyi ciddi qlobal təhlükəyə çevrilir: "İlk növbədə, gözəl Bakıda bugünkü tarixi yüksək səviyyəli konfransın təşkilinə görə Azərbaycan Prezidenti İlham Əliyevi səmimi qəlbdən təbrik edirəm. Biz Azərbaycanın müasir iqlim təhdidlərinə qarşı mübarizədə beynəlxalq əməkdaşlığın genişləndirilməsi istiqamətində fəal səylərini tam dəstəkləyirik.
İqlim dəyişikliyi bu gün geosiyasi münaqişələrin artmasına birbaşa təsir edən ciddi qlobal təhlükəyə çevrilir. Xüsusilə yoxsulluq, ərzaq və enerji təhlükəsizliyi, su və resurslardan istifadə problemləri ilə mübarizə intensivləşir. Biz Mərkəzi Asiyada bu hadisələrin nəticələrini çox hiss edirik. İqlim problemləri əhalimizin həyat keyfiyyətinin yaxşılaşdırılması və milli inkişaf strategiyalarının həyata keçirilməsi yolunda yeni maneəyə çevrilir.
Paris sazişi çərçivəsində əsas məqsədimiz regionda havanın temperaturunun kəskin artmasının qarşısını almaq və cari əsrdə onu 1,5-2 dərəcə saxlamaqdır".
Şavkat Mirziyoyev Özbəkistanın iqlim dəyişikliyi ilə mübarizə təşəbbüsləri sahəsində bir sıra təşəbbüslər də irəli sürüb: Özbəkistan İqlim İtkilərinin Qiymətləndirilməsi üzrə Beynəlxalq Mərkəz, Transsərhəd su ehtiyatlarının mühafizəsi, Regional genetik ehtiyatlar bankı, BMT-nin innovativ aqro-sənaye mərkəzi, Dünya İqlim Paytaxtlarının Alyansı, Qlobal gənclərin yaşıl təşəbbüslər festivalı.
Ağarza Elçinoğlu
