"Amazon.com" şirkətinin bulud hesablama bölməsi çərşənbə axşamı günü tədqiqatçılara öz süni intellekt çiplərindən istifadə üçün pulsuz hesablama gücü təklif edəcəyini açıqladı. Bu addımla Amazon, tədqiqatçılar arasında məşhur olan Nvidia-ya rəqib olmağı hədəfləyir.
Valyuta.az "Yahoo Finance"ə istinadən xəbər verir ki, "Amazon Web Services" (AWS) öz bulud mərkəzlərində təqdim etdiyi kreditlər vasitəsilə "Nvidia", "Advanced Micro Devices" və "Alphabet"in bulud bölməsi ilə rəqabət aparan "Trainium" adlı süni intellekt modellərinin hazırlanmasına yönəlmiş çipindən istifadəni təklif edəcək. AWS bu məqsədlə tədqiqatçılara 110 milyon dollar dəyərində bulud xidməti təmin edəcək. "Carnegie Mellon" Universiteti və Kaliforniya Universitetinin (Berkeley) tədqiqatçıları artıq bu proqramda iştirak edirlər. Şirkət bu proqram üçün birinci nəsil "Trainium" çiplərindən 40,000 ədəd təqdim etməyi planlaşdırır.
Bu addım, hələ də satışlar üzrə ən böyük bulud hesablama şirkəti olan "AWS"nin "Microsoft" tərəfindən sərt rəqabətlə üzləşdiyi bir vaxtda atılır. Proqram təminatı inkişaf etdiriciləri süni intellekt işləri üçün yeni çip növlərindən istifadə etməyə maraq göstərirlər. "AWS" "Nvidia"nın strategiyasından fərqli bir yanaşma ilə öz süni intellekt çiplərini ön plana çıxarmağa çalışır, - deyə "AWS"nin süni intellekt çipləri üzrə biznesin inkişafına rəhbərlik edən Qadi Hutt bildirib.
Əksər süni intellekt inkişaf etdiriciləri "Nvidia" çiplərini proqramlaşdırmaq üçün "CUDA" adlı əsas proqram təminatından istifadə edirlər və çipi birbaşa proqramlaşdırmırlar. "AWS" isə öz çipinin ən əsas hissəsi olan təlimat dəsti arxitekturası barədə sənədləri dərc etməyi və müştərilərə çipi birbaşa proqramlaşdırmaq imkanı verməyi planlaşdırır.
Hutt qeyd edib ki, bu yanaşma, eyni anda on minlərlə çipdən istifadə edildikdə kiçik düzəlişlər etməklə böyük irəliləyişlər əldə edə biləcək iri müştəriləri cəlb etməyə yönəlib.
"Yüz milyonlarla, hətta daha çox dəyərdə icarəyə götürülmüş hesablama gücü istifadə edən insanları düşünün," - deyə Hutt bildirib. "Performansı artırmaq və xərcləri azaltmaq üçün mümkün olan hər bir imkandan istifadə etmək istəyərdilər."
Rəhim
