Olaylar xəbər verir ki, bu barədə Avropa Kommisiyası nümayəndəsi Jacob Verksman mətbuat konfransı zamanı deyib.
"Avropa Komissiyası Prezidenti Ursula fon der Lyayen COP29-a gəlmək istəyirdi. O, bundan öncəki, COP konfranslarında da iştirak edib. Ursula fon der Lyayen burada olmağı çox istəyirdi. Lakin o, eyni zamanda Brüsseldə, Aİ-nin 2050-ci ilə qədər xalis sıfıra doğru getməsini təmin etmək üçün bir mandatın verilməsində xidmət edəcək Komissarlar Kollecini bir araya gətirdiyi bir məqamda öz vəzifələrini yerinə yetirməli idi", - o bildirib.
"Bu arada, təbii ki, daha əvvəl qeyd etdiyim kimi, COP29-da üzv dövlətlərin dövlət və hökumət səviyyəsində yüksək səviyyədə iştirakı, eləcə də Avropa Şurasının iştirakı mövcud idi. Hər hansı ikitərəfli fikir ayrılıqlarından asılı olmayaraq, COP bütün tərəflərin gəlmək və iqlimlə bağlı fəaliyyətə dair danışıqlar aparmaq azadlığını hiss etdiyi bir yer olmalıdır.
COP sədrliyi, əlbəttə ki, tam və inklüziv iştirakı təmin etmək və artırmaq üçün xüsusilə mühüm rola və məsuliyyətə malikdir", - deyə o bildirib.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir - Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
