Bosniya və Herseqovinanın tərkib hissəsi olan Serb Respublikasının prezidenti Milorad Dodikin bəyanatı qalmaqala səbəb olub.
HİT.az xəbər verir ki, Dodik Serb Respublikasından olan gənclərin qonşu ölkə Serbiyada məcburi hərbi xidmət keçmələrini müdafiə edib.
2025-ci ildə Serbiyada məcburi hərbi xidmət bərpa olunacaq. Bosniya rəhbərliyi Milorad Dodikin təşəbbüsünü "dövlət institutlarına zərbə" və 8 il həbs cəzası ilə cəzalandırılan Müdafiə Qanununun pozulması kimi qiymətləndirib.
Milorad Dodik Serbiya mətbuatına müsahibəsində qalmaqallı açıqlama verib. O bildirib ki, Serb Respublikası hökuməti öz çağırışçılarının qonşu Serbiyada hərbi xidmət keçməsinin tərəfdarıdır. Bundan başqa, cənab Dodikin sözlərinə görə, hökumət gəncləri “erkən məşğulluq, eləcə də digər imtiyazlar və dəstək növləri ilə təmin etməklə” bu işə həvəsləndirmək niyyətindədir.
Milorad Dodikin təşəbbüsü Serbiya Prezidenti Aleksandar Vuçiçin respublikada 2025-ci ildən ləğv edilmiş icbari hərbi xidmətin geri qaytarılması ilə bağlı sentyabr ayında verdiyi qərara bir növ reaksiya olub. Serb çağırışçılar 75 gün xidmət edəcəklər.
Serb Respublikası prezidentinin bəyanatı Bosniyada siyasi qalmaqala səbəb olub. Bu həftə o, Bosniya hökumətinin demək olar ki, bütün əsas üzvləri tərəfindən sərt şəkildə tənqid edilib.
İlk olaraq müdafiə naziri Zukan Helez çıxış edib. O, Milorad Dodikin təşəbbüsünü ölkənin simvolu olan silahlı qüvvələrə və digər dövlət qurumlarına birbaşa zərbə adlandırıb. Nazir xəbərdarlıq edib ki, Serb Respublikası prezidenti öz bəyanatı ilə Bosniya və Herseqovinanın vətəndaşlarına hərbi xidmət keçməyi və hətta başqa dövlətlərin silahlı qüvvələrinə çağırışçı kimi təlim keçməsini qadağan edən Müdafiə Qanununu pozur. Müdafiə naziri izah edib ki, "Müdafiə haqqında" qanunu pozmaq deyil, həm də ona çağırış etmək, təhrik etmək cinayətdir.
Bosniya Daxili İşlər Nazirliyinin rəhbəri Ramo İsak bildirib ki, Cinayət Məcəlləsi "Müdafiə Qanununu" pozmağa görə ən azı səkkiz il həbs cəzası nəzərdə tutur: "Bosniya və Herseqovina silahlı qüvvələrinin serb xalqı sıralarından olan üzvləri heç vaxt Milorad Dodik və onun ətrafının istədiyi kimi Serbiya ordusunda, Rusiya silahlı qüvvələrində və ya başqa bir orduda xidmət etməyəcəklər".
Nazirin sözlərinə görə, Serb Respublikasının prezidenti ilə yalnız Bosniyada məcburi hərbi xidmət müzakirə oluna bilər:
"Müzakirə mövzusu olmayan mövzular Bosniya və Herseqovinanın silahlı qüvvələrinin mahiyyəti və ölkəmizin NATO-ya qəbulu istiqamətində fəaliyyətdir, bizim respublikanın müdafiəsi haqqında qanunla buna məcburuq".
Bosniyanın xarici işlər naziri Elmedin Konakoviç isə Milorad Dodiki cinayət işi üzrə məhkəməyə verəcəyini vəd edib. Belə olan halda Serb Respublikası prezidentini növbəti məhkəmə prosesi gözləyir. İndi o, beynəlxalq ictimaiyyətin Bosniyadakı ali nümayəndəsi Kristian Şmidtin qərarlarına tabe olmamaqda ittiham olunur və buna görə də çoxillik həbs cəzası nəzərdə tutulur.
Samir
