Cənubi Koreyalı Hyundai Motor, Şirkətin ABŞ üzrə Baş direktoru və qlobal əməliyyatlar üzrə baş direktoru Xose Munozu (Jose Munoz) şirkətin yeni Baş direktoru təyin edib. Şirkətin top menecmentinə əcnəbi menecerin təyin edilməsi Cənubi Koreya şirkəti üçün diqqətəlayiq detal hesab olunur.
Marja xəbər verir ki, bu lider dəyişikliyi ABŞ-da böyük sərmayələr yatırmış Cənubi Koreya şirkətlərinin Donald Trampın ikinci prezidentliyinə hazırlaşdığı dövrə təsadüf edib.
Hyundai bildirib ki, idarəetmə dəyişikliyi "onun qlobal rəqabət qabiliyyətini artıracaq" və "qlobal biznes mühitində qeyri-müəyyənliklərə daha yaxşı hazırllaşmağa töhfə verəcək". Hazırda Hyundai-nin üç birgə Baş direktoru var. Moncu 4-cü Baş direktor olacaqdır.
Munoz bu vəzifəni Euisun Chung, Lee Dong-seok və avtomobil bölməsinə nəzarət edən qrup vitse-prezidenti Chang Jae-hoon ilə birlikdə icra edəcəkdir.
Trampın Şimali Koreya lideri Kim Jong Un ilə ilk görüşündə iştirak edən keçmiş ABŞ diplomatı Sung Kim qlobal xarici siyasətdən məsul prezident təyin edilib.
ABŞ-da elektrikli avtomobil satışında Tesla-dan sonra ikinci yerdə olan Hyundai və Kia, Trampın idxal tariflərini və elektrikli avtomobil subsidiyalarını azaltma vədlərindən ciddi şəkildə təsirlənəcəklərini gözləyərək tədbirlər görür.
Həmçinin Tramp, Kia-nın zavodunun olduğu Meksikadan gətirilən avtomobillərə 200 faizlik rüsum tətbiq etməyi düşünür.
İspaniya əsilli və ABŞ vətəndaşı olan Munoz 2019-cu ildə Hyundai şirkətinə qoşulub və "Hyundai Motor USA" şirkətinin baş direktoru vəzifəsində çalışıb. Munoz Hyundai-nin elektrikli avtomobillərə olan bağlılığını artırmaqla və satışlarının artmasına əhəmiyyətli töhfələr verməklə tanınır.
Hyundai məsələ ilə bağlı açıqlamasında belə deyib:
“Munoz Hyundai Motor-un koreyalı olmayan ilk Baş direktoru təyin edilib. Şirkətin qlobal idarəetmə sistemlərini təkmilləşdirməsi və qlobal brend statusunu yüksəltməsi gözlənilir".
Hyundai bildirib ki, Munoz ikinci Tramp administrasiyasının yarada biləcəyi çətinliklərin öhdəsindən gəlməkdə mühüm rol oynayacaq.
Son illərdə Hyundai ABŞ-da administrasiya dəyişikliyi nəticəsində yarana biləcək siyasət qeyri-müəyyənliklərinə hazırlaşmaq üçün “Qlobal Siyasət Ofisi”nə bir çox Cənubi Koreyalı keçmiş diplomatları işə götürüb.
Yanvar ayında Hyundai-nin qlobal ticarət və xarici əlaqələr strategiyalarını dəstəkləmək üçün Sung Kimi məsləhətçi kimi işə qəbul edib.
Hyundai, ABŞ-ın Corciya ştatında 12,6 milyard dollarlıq elektrik avtomobili və akkumulyator batareyası istehsalına sərmayə qoyub və bu, Cənubi Koreyadan kənarda ən böyük sərmayəsi olub. Bununla belə, Trampın keçid komandası elektrikli avtomobil alışı üçün 7500 dollar vergi güzəştini ləğv etməyi planlaşdırır. Munoz bir vaxtlar Carlos Ghosn-un işdən çıxarılmasından sonra Yapon avtomobil istehsalçısı Nissan-ın sükanı ələ keçirməyə potensial namizəd kimi göstərilirdi.
