COP29 çərçivəsində Yaşıl Zonada “Yaşıl biznes quruculuğu” adlı panel müzakirə keçirilib.
Panelin moderatoru “McKinsey” şirkətinin baş tərəfdaşı Stefan Helmcke biznes quruculuğunda “yaşıl biznes”in əhəmiyyətini vurğulayıb.
Daha sonra “BeWorks UK” şirkətinin təsisçi və baş direktoru Fidan Cavadova, “S3/Esyasoft Technologies” şirkətinin ölkə üzrə meneceri Mövlan Paşayev, “PAŞA İnnovation” şirkətinin baş direktoru Fərrux Əliyev, “BMTİP”in Avropa və Mərkəzi Asiya üzrə gənclər nümayəndə heyətinin nümayəndəsi Anastasiya Djordja Bosansik çıxış edərək bu istiqamətdə fikirlərini bölüşüblər.
Panel çərçivəsində dayanıqlı müəssisələrin qurulmasında yaşıl startapların qarşılaşdığı bənzərsiz problem və imkanlar müzakirə olunub.
Vurğulanıb ki, ekoloji şüurlu məhsul və xidmətlərə tələbat artdıqca, sahibkarlar innovasiyaları təşviq edərək daha yaşıl iqtisadiyyata keçidi sürətləndirirlər.
Ekspertlər qrupu dayanıqlı satınalma, tullantıların azaldılması və enerji səmərəliliyi üzrə təcrübələrin həyata keçirilməsi məqsədilə effektiv strategiyalar da daxil olmaqla, uğurlu yaşıl biznes qurmaq üçün vacib addımları müzakirə ediblər.
Sessiyada yaşıl təşəbbüslərin genişləndirilməsi üçün maliyyələşmə və investisiyaların təmin edilməsinin vacibliyi, eləcə də yaşıl startaplar üçün dəstəkləyici ekosistemin gücləndirilməsində əməkdaşlığın rolu vurğulanıb.
İştirakçılar dayanıqlılığı artırmaq məqsədilə tənzimləyici mühitləri idarə etmək və texnologiyadan yararlanmaq barədə yanaşmalarını bölüşüblər, ümid ediblər ki, yeni nəsil sahibkarlarını ətraf mühitin qorunmasına müsbət töhfə verəcək.
Orxan Vahidoğlu, “İki sahil”
