“Liverpul”un misirli ulduz hücumçusu Məhəmməd Salah meydanda oyununa heyran olduğu futbolçuların adlarını çəkib.
Arena.az məlumat verir ki, Salah bu barədə “Liverpul”u rəsmi “YouTube” kanalında danışıb:
“Mənə Ronaldo, Zidan və Tottinin necə oynadıqları xoşdur. Həmişə onlara baxırdım. Onlar oyundan zövq alırdılar. Avropada oynamağa başlayanda Kristiano Ronaldoya da baxırdım. O, hər şeyi futbola həsr edib. Onun özünə qulluq tərzi – divanəlikdir. Onun göstəricilərini özünüz də görə bilərsiniz.
Totti ilə oynamaq üçün əla fürsətim oldu. Onunla iki il “Roma”da oynamışam. Bu, inanılmaz vaxt idi. O, təsirli idi, onun texnikası dəli-dolu idi. Həm də o, çox, çox yaxşı insandır”, deyə Salah vurğulayıb.
Məhəmməd Salah 2017-ci ilin iyulundan “Liverpul”da çıxış edir. İngiltərə nəhəngi həmin vaxt Salahın “Roma”dan transferi müqabilində 42 milyon avro məbləğində xərc çəkmişdi. Misirli ulduzun “qırımızlar”la müqaviləsi 2025-ci ilin iyun ayının sonuna qədər qüvvədədir.
Salah cari mövsümdə “qırmızılar”ın heyətində bütün yarışlarda 17 oyuna 10 qol vurub, 10 məhsuldar ötürmə verib. Misirli hücumçunun “Liverpul”un heyətində ümumi statistikası isə belədir: 366 oyun, 221 qol, 99 məhsuldar ötürmə.
Misirli ulduz hücumçu “Liverpul”la bütün mümkün ali klub yarışlarının qalibi olub.
Salah “Liverpul” və “Roma”dan başqa, “Fiorentina”, “Çelsi”, “Bazel” və “Əl-Mukavilun” klublarında çıxış edib.
Məhəmməd Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 101 oyun keçirib, 58 qol vurub, 33 məhsuldar ötürmə verib.
“Transfermarkt” internet-portalı 32 yaşlı misirli cinah hücumçusunun transfer dəyərini 55 milyon avro məbləğində qiymətləndirir.
