Olaylar xəbər verir ki, bu barədə Adaptasiya Fondunun (AEF) İdarə Heyətinin sədri Lukas di Pietro COP29 çərçivəsində keçirilən "İqlimə davamlı gələcək üçün insan inkişafına sərmayə qoyuluşu üzrə Yüksək Səviyyəli Görüş"də çıxışı zamanı deyib.
O qeyd edib ki, Bakı Təşəbbüsü inkişaf etməkdə olan ölkələrin ən həssas icmalarına fayda verən konkret iqlimə uyğunlaşma layihələrini maliyyələşdirmək üçün nəzərdə tutulmuş uyğunlaşma fondları ilə mükəmməl şəkildə uyğunlaşan mühüm addımdır.
"Biz uşaqların, gənclərin, qadınların və təcrid olunmuş qrupların ehtiyaclarını prioritetləşdiririk. Hər kəsin uyğunlaşma və yaradıcılıq üçün daha yaxşı gələcək qurmaq imkanının olmasını təmin edir, uzunmüddətli institusional və inanca əsaslanan bacarıqların yaradılmasına çalışırıq.
Bizim birlikdə dayanıqlığı gücləndirmək, dünya üçün davamlı və ədalətli gələcəyi təmin etmək imkanımız var. Gəlin bu öhdəliyi davamlı dəyişikliklərə səbəb olan müsbət hərəkətlərə çevirək", - deyə o bildirib.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir - Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
