Bakıda keçirilən BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Azərbaycan fermerlər üçün Harmoniya İqlim Təşəbbüsünə başlanıldığı elan ediləcək.
"Report" xəbər verir ki, bunu Azərbaycanın kənd təsərrüfatı naziri Məcnun Məmmədov COP29 çərçivəsində keçirilən “Davamlı və ədalətli gələcək üçün qadınları, gəncləri və innovasiyaları gücləndirən iqlimə davamlı kənd təsərrüfatı" tədbirində deyib.
Onun sözlərinə görə, bu təşəbbüs fermerləri uyğunlaşdırmaq, inkişaf etdirmək və uğur qazanmaq üçün lazım olan alətlər, resurslar və əlaqələrlə gücləndirmək üçün platformadır: “Noyabrın 19-da - Ərzaq, Kənd Təsərrüfatı və Su Günündə fermerlər üçün Bakı Harmoniya İqlim Təşəbbüsünü rəsmi olaraq elan ediləcək. Bu, bizim üçün qürurverici bir məqamdır və fermerlərin davamlı həll yolları ilə gücləndirilməsi istiqamətində mühüm addımdır".
Nazir bildirib ki, kənd təsərrüfatı cəmiyyətlərin əsasını təşkil edir: “İnsanlarımızı qidalandırır, iqtisadiyyatlarımızı dəstəkləyir və milyonlarla insanı işlə təmin edir. Bu gün fermerlər artan problemlərlə üzləşirlər. İqlim dəyişikliyi, məhdud resurslar və dəyişən bazar tələbləri kənd təsərrüfatına hər tərəfdən təzyiq göstərir. Azərbaycanda biz bu çağırışları yaxşı başa düşürük və kənd təsərrüfatı icmalarımızı həqiqətən dəstəkləyən həll yollarını tapmağa sadiqik".
M. Məmmədov deyib ki, Harmoniya təkbaşına uğur qazana bilməz: “Tərəfdaşlıq vacibdir və biz bu gün burada təmsil olunan təşkilatlar və hökumətlərlə işləməkdən qürur duyuruq. Təcrübəmizi, resurslarımızı və öhdəliyimizi birləşdirərək, biz nəinki sağ qalan, həm də inkişaf edən, ərzaq təhlükəsizliyini, iqtisadi gücü və hər kəs üçün ətraf mühitə qayğı göstərən kənd təsərrüfatı sektoru qura bilərik. Biz birlikdə fermerlərimizi gücləndirən və sabahın çətinliklərini dəf edən kənd təsərrüfatı gələcəyi yarada bilərik".
