"İranın Rusiyanın S-400 zenit-raket sistemlərinə ehtiyacı yoxdur".
Qaynarinfo xəbər verir ki, bunu İslam İnqilabı Keşikçiləri Korpusunun (SEPAH) yüksək vəzifəli rəsmisi deyib.
Bir aydan az əvvəl Rusiyanın hava hücumundan müdafiə sistemləri İsrailin raket hücumunu dəf edə bilməyib və ABŞ və İsrail kəşfiyyatının məlumatlarına görə, onların özləri məhv edilib.
İran İslam İnqilabı Keşikçiləri Korpusunun aerokosmik qüvvələrinin əməliyyatlar üzrə müavini Davud Şeyxian bildirib ki, İran Rusiyadan S-400 sistemi istəməyib. "Bizim hazırkı sistemlərimiz S-400-dən qat-qat böyük imkanlara malikdir", deyə o əlavə edib.
Onun sözlərinə görə, İran Rusiya istehsalı olan S-300 sistemlərindən fəal şəkildə istifadə edir və S-400-ə ehtiyac görmür.
Avqustun əvvəlində "The New York Times” yazıb ki, İran rəhbərliyi İsraillə müharibədən ehtiyat edərək Moskvadan qabaqcıl hava hücumundan müdafiə sistemləri (Rusiya tərəfindən istehsal edilən ən qabaqcıl hava hücumundan müdafiə sistemi olan S-400 Triumf kompleksləri ola bilər) istəyib. Qəzetə birinin SEPAH üzvü olan hərbi planlaşdırma ilə tanış olan iki iranlı rəsmi bildirib ki, bu tələb Rusiya Təhlükəsizlik Şurasının katibi Sergey Şoyqu tərəfindən Tehrana səfəri zamanı edilib.
İsrail oktyabrın 1-də İranın raket hücumuna cavab verəcəyini vəd edəndə İran mediası Rusiyanın Tehrana ən azı bir eskadrilya Su-35 qırıcı təyyarəsi və qeyri-müəyyən sayda S-400 sistemləri verdiyi barədə təsdiqlənməmiş məlumatları dərc etməyə başlayıb.
Nəticədə, İranın hava hücumundan müdafiəsi İsrailin oktyabrın 26-na keçən gecə F-35 qırıcıları da daxil olmaqla 100-ə yaxın təyyarənin həyata keçirdiyi hücuma qarşı duruş gətirə bilməyib. İsrail bu il Rusiya ordusuna verilməyə başlayan İran ballistik raketləri üçün yanacaq istehsal edən 12 obyekti sıradan çıxarıb, həmçinin ilin əvvəlindən nüvə silahı araşdırmaları aparan gizli mərkəzi məhv edib.
Üstəlik, xidmətdə olan üç S-300 sistemi nəinki İran obyektlərini qoruya bilməyib, həm də onlar özləri də məhv edilib. Amerika və İsrail rəsmiləri bu barədə "The Wall Street Journal”a bildiriblər və qeyd ediblər ki, əgər Rusiya sistemləri bəzi raketləri vura bilsə də, onların sayı bir neçə ədəd ola bilər.
İranın ümumilikdə dörd S-300 sistemi olub, onlardan biri bu ilin əvvəlində İsrailin hücumu zamanı zədələnib.
Nizami Bağırov
