Oktyabr ayında İsrail İranın nüvə istehsalı ilə bağlı müəssisələrindən birini məhv edib.
Bunu İsrailin baş naziri Benyamin Netanyahu deyib. Onun sözlərinə görə, ötən ay İsrailin İrana hava hücumu Tehranın nüvə proqramının elementlərinə zərbə vurdu. Bu, ölkənin müdafiə qabiliyyətini və raket istehsalı imkanlarını zəiflətdi.
"Bu, heç kimə sirr deyil. Onların nüvə proqramında bu hücum nəticəsində zədələnmiş müəyyən komponent var", - Netanyahu bildirib.
O, hansı komponentdən söhbət getdiyini açıqlamayıb, lakin əlavə edib ki, İranın nüvə silahı yaratmaq yolu bağlanmayıb. Netanyahu çıxışında İsrailin hücumlarda nəyi hədəf aldığına dair bir sıra əlavə təfərrüatlar verib. Ən diqqətəlayiq haldır ki, aprel ayında İsrailin endirdiyi zərbə İranın paytaxtı Tehran ətrafında Rusiya tərəfindən təchiz edilmiş dörd S-300 zenit-raket batareyasından birini məhv edib.
Oktyabrda isə İsrail qalan üç batareyanı məhv edib və İranın ballistik raketlər istehsal etmək qabiliyyətinə və uzaq mənzilli ballistik raketlərdə istifadə olunan bərk yanacağa ciddi ziyan vurub.
Xatırladaq ki, “Axios”un məlumatına görə, İsrail ordusu oktyabrın sonundakı hücum zamanı İranda fəaliyyət göstərən çox məxfi nüvə silahı tədqiqat mərkəzini məhv edib.
Xüsusilə də hədəflərdən biri Tehranın cənub-şərqindəki Parçin hərbi kompleksində yerləşən Taleqan-2 obyekti olub. Peyk görüntülərinə görə, hücum nəticəsində Taleghan-2 binası tamamilə dağılıb.
Oxuməni.az
