İsrailin Livanın cənubundakı Sur şəhərinə hücumu nəticəsində daha iki tibb işçisi həyatını itirib. Livanın Səhiyyə Nazirliyi İsrail ordusunun Sur şəhərinin Qana bölgəsində tibb işçilərini hədəf aldığını açıqlayıb. Nazirlik, İsrailin beynəlxalq qanunları və humanitar normaları pozmağa davam etdiyini vurğulayıb və hücum nəticəsində iki tibb işçisinin öldüyünü bildirib.
Bundan əlavə, İsrail döyüş təyyarələri Nəbatiyyə bölgəsində yerləşən İslam Sağlamlıq Təşkilatına aid mərkəzə də zərbə endirib. Bu hücum nəticəsində altı tibb işçisi həlak olub. Livan Qızıl Xaç Cəmiyyəti və Beynəlxalq Qızıl Xaç Komitəsi, hədəf alınan tibb işçilərinin cəsədlərinin tapıldığını açıqlayıb.
Livan Səhiyyə Nazirliyinin məlumatına görə, 2023-cü ilin 8 oktyabr tarixindən etibarən İsrailin Livana təşkil etdiyi hücumlar nəticəsində 3481 nəfər həyatını itirib, 14 786 nəfər isə yaralanıb. İsrail ordusu 23 sentyabr tarixindən sonra Livanın cənubundakı şəhərlər, Bekaa və Baalbek bölgələrinə yüzlərlə hava zərbəsi endirib.
Qeyd edək ki, "Hizbullah" lideri Həsən Nəsrullah sentyabrın 27-də, İsrailin Beyruta endirdiyi hava zərbəsi nəticəsində öldürülüb.
