İspaniyanın “Las Palmas” klubunun hücumameyilli yarımmüdafiəçisi Alberto Moleyro “Barselona”da oynamaq arzusunda olduğunu açıqlayıb.
Arena.az 21 yaşlı ispan futbolçunun bu barədə fikrini təqdim edir:
“Mən “Las Palmas”da xoşbəxtəm. Bu klubdan ayrılmağı düşünmürəm. Amma gələcəkdə “Barselona” kimi böyük kluba keçəcəyimə ümid edirə”, deyə Moleyro vurğulayıb.
Futbola İspaniyanın “Sobradillo” klubunda başlamış Alberto 2018-ci ildən “Las Palmas”ın sıralarındadır. 21 yaşlı yarımmüdafiəçi 2021-ci ildən bu klubun əsas komandasında çıxış edir. O, indiyə qədər “Las Palmas”ın heyətində 124 oyunda iştirak edib, 11 qola imza atıb, 13 məhsuldar ötürmə müəllifi olub.
Alberto Moleyronun “Las Palmas”la 2026-cı ilin 30 iyununa qədər müqaviləsi var. Gənc futbolçunun “Barselona” ilə bağlı arzularına baxmayaraq, Kataloniya klubunun yarımmüdafiəçinin xidmətində maraqlı olub-olmadığı bilinmir.
Əslən Kubadan olmasına baxmayaraq, Alberto Moleyro İspaniya vətəndaşıdır. O, bu ölkənin U-19 və U-21 yığmalarında forma geyinib. 21 yaşlı futbolçunun yaxın gələcəkdə əsas millidə də debüt etməsi gözlənilir.
Alberto Moleyronun futbolda hələlik heç bir titulu yoxdur.
“Transfermarkt” internet-portalı 21 yaşlı yarımmüdafiəçinin transfer dəyərini 20 milyon avro məbləğində qiymətləndirir.
