Azərbaycanla Türkiyə arasında bütün sahələrdə olduğu kimi, əmək və sosial müdafiə sahəsində əməkdaşlıq daim genişlənir.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən AZƏRTAC-a verilən məlumata görə, bu fikir COP29 tədbirində iştirak etmək üçün ölkəmizdə səfərdə olan Türkiyənin əmək və sosial müdafiə nazirinin müavini Lütfihak Alpkanın başçılıq etdiyi nümayəndə heyəti ilə 1 saylı Bakı DOST Mərkəzində keçirilən görüşdə vurğulanıb.
Nümayəndə heyəti mərkəzdə əhaliyə göstərilən xidmətlərlə tanış olub. Onlara DOST Konsepsiyasının innovativ üstünlükləri və beynəlxalq nailiyyətləri barədə məlumat verilib.
Görüşdə əmək və əhalinin sosial müdafiəsi nazirinin müavini Anar Əliyev Azərbaycan və Türkiyə dövlət başçılarının birgə səyləri nəticəsində qardaş ölkələr arasında münasibətlərin müttəfiqlik səviyyəsinə yüksəldiyini, regional və beynəlxalq təşkilatlar çərçivəsində də uğurla davam etdirilən əlaqələrin əmək və sosial müdafiə sahəsini də əhatə etdiyi deyib.
Ötən dövrdə Azərbaycanla Türkiyə arasında əmək və sosial müdafiə sahəsində əməkdaşlığın genişlənməsinə xidmət edən 8 sənədin imzalandığı, bu sahədə ikitərəfli əlaqələrin getdikcə genişləndiyi, fəal təcrübə mübadilələrinin aparıldığı diqqətə çatdırılıb. Bakıda keçirilən COP29 çərçivəsində yaşıl iqtisadiyyata ədalətli keçidlə bağlı yaşıl iş yerləri və bacarıqların inkişaf etdirilməsinə dair müxtəlif ölkələrin, beynəlxalq təşkilatların yüksəksəviyyəli rəsmilərinin iştirakı ilə aparılan müzakirələrin əhəmiyyəti vurğulanıb. Azərbaycanda əmək, məşğulluq və sosial müdafiə sahələrində aparılan islahatlar barədə məlumat verilib.
L.Alpkan iki ölkə arasında yüksək səviyyədə olan münasibətlərin sosial sahədə də uğurla davam etməsindən məmnunluğunu bildirib.
Görüşdə əmək və sosial müdafiə sahələrində gələcək əməkdaşlıq məsələlərinə dair fikir mübadiləsi aparılıb.
