Demokrat.az-ın məlumatına görə, tədbir Türk Dövlətləri Təşkilatı və Türk İnvestisiya Fondunun dəstəyi ilə təşkil olunub.
Qazaxıstan, Azərbaycan, Qırğızıstan, Türkiyə, Özbəkistandan 200-dən çox uğurlu iş qadını, hökumət nümayəndələri, investorlar və ekspertlər türk dünyasında qadınların iqtisadi rolunun gücləndirilməsi istiqamətində strateji addımları müzakirə etmək üçün bir araya gəlib.
Tədbirdə bildirilib ki, 2024-cü ildə Şuraya sədrlik edən Qazaxıstan bu sahədə liderlik nümayiş etdirir. Ölkənin kiçik və orta şirkətlərinin 49%-nə qadınlar rəhbərlik edir. Bu, Türk Dövlətləri Təşkilatı çərçivəsində dövlət dəstəyinin və inteqrasiya proseslərinin səmərəliliyinin nümunəsidir. Qazaxıstan təlim, sürətləndirmə və maliyyələşdirmə proqramlarına sadələşdirilmiş çıxış yolu ilə qadın sahibkarlığını fəal şəkildə təşviq edir.
Türkdilli Dövlətlərin Sahibkar Qadınlar Şurasının sədri Ləzzət Ramazanova deyib ki, türk dünyasında qadın sahibkarlığının çiçəkləndiyi, yeni səviyyəyə yüksəldiyi bir ekosistem yaradırıq. Ölkələrimiz arasında ticarətin intensivləşməsi və birgə layihələrin həyata keçirilməsi təkcə iqtisadi artım deyil, həm də beynəlxalq əlaqələrin və sosial sabitliyin möhkəmlənməsi deməkdir.
Türk Ölkələri Ticarət və Sənaye Palataları Birliyinin (TCCI) baş katibi Adem Kula qadınların regionun davamlı iqtisadi inkişafı və rifahının əsasını təşkil etdiyini bildirib: "Təmsil etdiyim birlik qadınlara öz potensiallarını reallaşdırmağa və türk dünyasında yeni layihələr həyata keçirməyə kömək edən təşəbbüsləri ardıcıl olaraq dəstəkləyir. Qazaxıstan bu prosesə mühüm töhfə verir”.
Tədbirdə mədən, emal və enerji kimi strateji sahələrdə qadınların rolunun gücləndirilməsinə diqqət yetirilib. İştirakçılar sənaye təhlükəsizliyi və qadınların iqtisadiyyatda liderliyinin inkişafı ilə bağlı mühüm məsələləri müzakirə ediblər. Davamlı inkişaf və korporativ sosial məsuliyyət məsələlərinə böyük diqqət yetirilib. Forumda türk dünyası ölkələrindən olan qadın sahibkarların konkret uğur hekayələri təqdim olunub.
Assambleya çərçivəsində türk dünyası ölkələrinin işgüzar fəallığının konsolidasiyası və genişləndirilməsi sahəsində əməkdaşlıq haqqında Memorandum imzalanıb. Memorandumun tərəfləri Türkdilli Dövlətlərin Qadın Sahibkarları Şurası, Qazaxıstan Rəqəmsal İnkişaf, İnnovasiya və Aerokosmik Sənaye Nazirliyi, Qazaxıstan Ticarət və İnteqrasiya Nazirliyi, Sənaye və Tikinti Nazirliyi olub.
Sənəd regionda inteqrasiya və əməkdaşlığın mühüm elementinə çevriləcək beynəlxalq platforma olan “Türk Biznes Qovşağı” təşəbbüsünün həyata keçirilməsinə yönəlib.
Platformaya aşağıdakılar daxil edilib:
• Sahibkarlar üçün vahid rəqəmsal ekosistem, standartların uyğunlaşdırılması və birgə infrastruktur layihələrinin həyata keçirilməsi.
• Biznes proseslərini təkmilləşdirmək və qlobal təchizat zəncirlərində iştirak etmək üçün təhsil və məsləhət proqramları.
• Namizəd sahibkarlara uğurlu biznes liderlərindən bilik və bacarıqlara çıxış əldə etməyə imkan verəcək mentorluq və təcrübə mübadiləsi sistemi.
• Kapitala çıxışı asanlaşdıracaq və yeni layihələrin daha sürətli işə salınmasına imkan verəcək e-ticarət və maliyyə platformasına çıxış.
Gözlənilir ki, “Türk Biznes Qovşağı”nın fəaliyyətə başlaması ilk 2-3 ildə ölkələr arasında ticarət dövriyyəsinin artmasına səbəb olacaq və 100-dən çox birgə təşəbbüsün irəli sürülməsinə imkan verəcək.
Tədbirdə qeyd olunub ki, gələcəkdə Türk Dövlətlərinin Qadın Sahibkarlar Şurası öz adını Türk Dünyasi İş Qadınları şəkilində yeniləyəcək. Bu da onun beynəlxalq aləmdə daha çox tanınmasına kömək edəcək və Dayanıqlı İnkişaf Məqsədlərinə nail olmaq istəyini vurğulayacaq.
Qadın Sahibkarlar Şurası 2025-ci ildə startaplar üçün bir sıra akselerasiya proqramlarına start verməyi, iştirakçı ölkələrdə tematik forumlar təşkil etməyi və regionun aparıcı biznes məktəbləri və universitetləri ilə əməkdaşlıqda yeni təhsil kursları hazırlamağı planlaşdırır. Bu təşəbbüslər qadın sahibkarlara əlavə dəstək, o cümlədən qrantlar və ixtisaslaşdırılmış təlim proqramları təmin edəcək.
