Fələstin rəhbərliyi İsrail hakimiyyətinin Qəzza zolağının şimal hissəsində, fələstinlilərə humanitar yardımın çatdırılması və paylanması üçün bufer zona yaratmaqla bağlı hər hansı ideya və planlarını qəbuledilməz hesab edir.
“Far.Az” WAFA agentliyinə istinadən xəbər verir ki, bu barədə Fələstin Milli Administrasiyasının rəsmi nümayəndəsi Nabil Əbu Rudeyna bildirib.
“İsrailin Qəzzanın şimalında və Cəbəliyyə rayonunda bufer zona yaratmaq planları fələstinlilər tərəfindən tamamilə rədd edilir, qəbuledilməzdir və Qəzza zolağının Fələstin dövlətinin ayrılmaz hissəsi olduğunu təsdiqləyən bütün beynəlxalq qanunları pozur”, - Rudeyna deyib.
O əlavə edib ki, Qəzzanın gələcəyini müəyyən edən hər hansı plan və ya zolağın əhalisinə yardım paylanması müstəsna olaraq Fələstin tərəfindən, həmçinin BMT-nin Yaxın Şərqdəki Fələstin Qaçqınlarına Yardım və İşlər üzrə Agentliyi (UNRWA) və ya digər beynəlxalq humanitar yardım strukturları vasitəsilə həyata keçirilə bilər.
WAFA-nın məlumatına görə, İsrail hazırda Fələstin anklavının şimal hissəsində və Cəbəliyyə qaçqın düşərgəsi yaxınlığında bufer zona yaratmaq planı hazırlayır və əmin edirlər ki, bu, humanitar yardımın bölgəyə sərbəst şəkildə çatdırılmasının təmin edilməsi üçündür. İsrail tərəfinin fikrincə, yardımın çatdırılması xaricdən maliyyələşən ABŞ təhlükəsizlik şirkəti tərəfindən həyata keçirilməlidir.
