Yaşıl Zonada “İqlim dəyişmələri şəraitində Kiçik ada dövlətləri və icmaların ekosistemləri” adlı sessiya keçirilib - FOTO

COP29 konfransı çərçivəsində Mavi Zonada keçirilən yüksək səviyyəli danışıqlarla yanaşı Yaşıl Zonada da müvafiq proqram üzrə silsilə tədbirlərin təşkili davam edir. Belə ki, noyabrın 21-də Yaşıl Zonada COP29 Azərbaycan Əməliyyat Şirkəti növbəti tədbirini təşkil edib.

Milli.Az Trend-ə istinadən bildirir ki, "İqlim dəyişmələri şəraitində Kiçik ada dövlətləri (SİDS) və icmaların ekosistemləri" adlı panel sessiyasında iqlim dəyişmələrinin artan təsirlərinə qarşı mübarizədə inkişaf etməkdə olan kiçik ada dövlətlərinin (SIDS) qarşılaşdıqları çətinliklər müzakirə olunub. Vanuatunun COP29 üzrə xüsusi elçisi Ali Serimin moderatorluğu ilə keçirilən müzakirə sessiyasında Millətlər Birliyi təşkilatının Baş katibi baroness Patrisiya Skotland, Tuvalunun daxili işlər, iqlim dəyişikliyi və ətraf mühit naziri Dr. Maina Talia, "ODI Global" mərkəzinin qlobal risk və dayanıqlılıq proqramının direktoru Dr. Rebekka Nadin, Birləşmiş Millətlər Təşkilatı yanında Palau Missiyasının müşaviri Anjelik Puponno, Azərbaycan Respublikasının Kosmik Agentliyi "Azərkosmos"un Coğrafi informasiya sistemləri Mərkəzinin tematik emal bölməsinin rəhbəri Murad Camalov iştirak ediblər.

Panel sessiyası zamanı qeyd edilib ki, dəniz səviyyəsinin yüksəlməsi və ekstremal hava hadisələrindən tutmuş mühüm ekosistemlərin itkisinə qədər meydana çıxan problemlər kiçik ada dövlətlərini xüsusilə həssaslaşdırır. İqlim dəyişmələrinin bu dövlətlər üçün yaratdığı sosial və iqtisadi nəticələr, o cümlədən köç, dolanışıq itkiləri, həmçinin dəniz və sahil resurslarına əsaslanan iqtisadiyyatların zəifləməsi kimi məsələlər tədbirdə müzakirə mövzusu olub. Sessiyada hemçinin təbii ekosistemlərin deqradasiyasının həm bioloji müxtəliflik, həm də köklü icmaların dolanışığı üçün yaratdığı təhlükə və digər bu kimi mühim məsələlərə toxunulub.

Panelistlər müzakirə zamanı iqlim dəyişmələri və onun fəsadlarına qarşı mübarizə üçün davamlı monitorinqin aparılması və onun nəticələrinə uyğun addımların atılmasının vacib olduğunu vurğulayıblar. Onlar bildiriblər ki, iqlimə dayanıqlı infrastrukturun yaradılması, gənc nəslin lazımi bilik və bacarıqlara yiyələnməsi və gələcəyə hazırlanması ilə yanaşı, yerli uyğunlaşma imkanlarının artırılması və ekosistemlərin qorunmasını icma yönümlü həllərlə birləşdirmək üçün strategiyaların hazırlanması bu mübarizədə ciddi əhəmiyyət kəsb edir.

Milli.Az
Xəbərlərimizi WhatsApp kanalımızdan da oxuyun

Məqaləyə dair fotomateriallar: